«Саҥа дьылга биэс хардыы»: куорат дьаһалтата бырааһынньыктыыр оннугар аһымал аахсыйаны тэрийиэҕэ

Бэҕэһээҥҥи планеркаҕа Дьокуускай куорат баһылыгын солбуйааччылар — Михаил Воробьев, Василий Гоголев, Павел Кириллин, Наталья Степанова уонна бастакы солбуйааччы Владимир Федоров «дьол суруктарын» туттулар. Хас биирдии кэмбиэргэ куорат социальнай тэрилтэлэрин (оскуола-интэринээттэр, кырдьаҕастар уонна инбэлииттэр дьиэлэрин) ааттара ыйыллыбыт. Усулуобуйа быһыытынан, Саҥа дьылы көрсө солбуйааччылар сүрүннүүр салааларын кытары тустаах социальнай тэрилтэҕэ көмө оҥоруохтаахтар итиэннэ бачыымы салгыыр эстафетаны куорат атын тэрилтэлэригэр туттарыахтаахтар.

Санатан эттэххэ, өссө сэтинньи саҕаланыыта,  куорат баһылыга Сардаана Авксентьева мээрийэ үлэһиттэрин Опера уонна балет судаарыстыбаннай тыйаатырыгар ыытыллар Саҥа дьыллааҕы корпоративтарын быйыл тохтоторго быһаарбыта, онон куорат бүддьүөтүттэн биир мөлүйүөн солкуобай харчы кэмчилэммитэ. Итинтэн сиэттэрэн, баһылыгы солбуйааччылар бэйэлэрин ахсааннарынан «Саҥа дьылга биэс хардыы» диэн аһымал санаа аахсыйатын тэрийэргэ быһаарбыттара. Аахсыйа түмүгүн таһаарыы итиэннэ сыл бастыҥнарын наҕараадалааһын баһылык үлэ кэлэктииптэрин кытары көрсүһүүтүгэр тэриллиэҕэ, диэн куорат дьаһалтатын уопсастыбаннаһы кытары үлэтин сүрүннүүр департамент иһитиннэрэр.

Раиса СИБИРЯКОВА, «Саха сирэ» хаһыат, edersaas.ru