Лондоҥҥа атынан тиийиэхтээх айанньыттар тустарынан Үчүгэйгэ биэрии усталлар
Өймөкөөн улууһун Үчүгэй нэһилиэгин ыччата Дугуйдаан Винокуров бу күннэргэ британец Никита Грецины кытта Лондоҥҥа атынан айаннаары, бэлэмнэнэ сылдьаллар.
edersaas.ru
Эдэр дьон Үчүгэй нэһилиэгиттэн 37 км «Дьакай» диэн тэйиччи учаастакка Дугуйдаан аҕата Семен Винокуров сылгы көрөр баазатыгар икки саха сылгытын -50 кыраадыс тымныыга айанныырга бэлэмнииллэр.
Кинилэри кытта «Саха» НКИХ режиссера Радомир Томскай уонна оператор Александр Слепцов бииргэ сылдьыһан, анал биэрии уста сылдьаллар.
Төһө да сибээс мөлтөҕүн иһин, син тохтуу-тохтуу да буоллар, суруналыыстары уонна Дугуйдааны бэйэтин кытта батсаабынан кэпсэттим.
— Таҥаспыт ICE Indigo Арассыыйа фирматын — 110 кыраадыһы тулуйар таҥас аныгы көрүҥэ. Тымныыны тулуйарын бэрэбиэркэлиибит. Чэпчэки, сылаас таҥас. Тоҥмоппут, — диир Дугуйдаан.
Оттон Радомир Томскай «ааспыт нэдиэлэҕэ устар тиэхиньикэ тоҥор тымныыта буола сылдьыбыта, бүгүн былытырда», диэн бэлиэтиир.
Өйүүн устар бөлөх уонна Лондоҥҥа барар айанньыттар Үчүгэйгэ кэлэн, Томторго ааһыахтаахтар. Никита Греци устунан дойдутугар айанныаҕа. Саҥа дьыллаан баран, Үчүгэйгэ олунньуга кэлиэҕэ. Айанньыттар устунан сыыйа Лондоҥҥа атынан айаҥҥа турунуохтара.
Дугуйдаан Винокуров уонна Никита Греци атынан икки сыл устата айанныыр былааннаахтар.
Елена ПОТОЦКАЯ, «Саха сирэ» хаһыат, edersaas.ru
Хаартыска — Александр Слепцов түһэриитэ.