«Дыгын оонньууларыгар» сүүмэрдиир күрэскэ отут алта эр бэрдэ күүһүн холоһор
Бэҕэһээ, бүгүн, муус устар 29-30 күннэригэр, “Дохсун” футбол манеһыгар “Дыгын оонньууларыгар” сүүмэрдиир күрэхтэһии бастакы түһүмэҕэ буола турар. Манна Тааттаттан, Мэҥэттэн, Чурапчыттан, Хаҥаластан, Өлүөхүмэттэн, Дьааҥыттан, Амматтан, Уус Алдантан, Кэбээйиттэн, Томпоттон, Горнайтан, Абыйтан, Намтан, Муоматтан, Сунтаартан отут алта эр бэрдэ биэс путевка иһин күрэс былдьаһа сылдьар.
edersaas.ru
Бэҕэһээ уолаттар «үс төгүл үскэ», «тутум эргииригэр» уонна мас тардыһыытыгар куоталаспыттара. Онно икки бастакы көрүҥҥэ Петр Старостин (Чурапчы) бастыҥ көрдөрүүлэннэ. Арай мас тардыһыытыгар отут үһүс миэстэнэн дуоһуйарга күһэлиннэ. Мадьынылар күрэстэригэр Владимир Никитин (Амма) тэҥнээҕин булбата.
Бүгүн эр бэртэрэ оҕунан ытыыга, 400 м сүүрүүгэ, хапсаҕайга уонна тааһы көтөҕүүгэ күрэс былдьаһаллар.
Санатан эттэххэ, былырыыҥҥы күрэскэ үс бастакы миэстэни ылбыт Егор Филиппов, Артем Варданян итиэннэ Алексей Козлов быйылгы “Дыгын оонньууларгыр” сүүмэрдээһинэ суох, быһа кыттар бырааптаахтар.
Хаалбыт түөрт путевка иһин ыам ыйын эргэтигэр “Орто дойду” этнокомплекска сытыы киирсиилэр буолаллара күүтүллэр.
Роман Попов, «Саха сирэ» хаһыат