Айсен Николаев бырабыыталыстыба хамыыһыйатын мунньаҕар этии киллэрдэ
Айсен Николаев атырдьах ыйын 18 күнүгэр Благовещенскайга РФ премьер-миниистирэ Михаил Мишустин бэрэссэдээтэллээн ыыппыт мунньаҕар кытынна. Саха сирин баһылыга Уһук Илин социальнай-экэнэмиичэскэй сайдыытыгар сыһыаннаах этиилэри киллэрдэ.
Айсен Николаев тутаах этиитэ чэпчэтиилээх лизинг судаарыстыбаннай бырагыраамаларын кытта сибээстээх, балар уу тырааныспарын уонна салгын суудуналарын саҥардыыга, суудунаны уонна авиа-тутууга омук тэрилин солбуйууга туһуланар.
“Бүгүн биһиги Өлүөнэнэн, Енисейинэн уонна атын да хоту өрүстэринэн тиэйиинэн дьарыктанар өрүс пароходстволара бэйэлэрин флоттарын саҥардар кыахтара суоҕун көрөбүт. Ити үчүгэй лизинг тиһигэ суоҕун кытта сибээстээх. Манан сибээстээн омук тэрилин солбуйууга көмөлөһөр лизинг бырагыраамаларын бүддьүөккэ бырайыактарын өйүүргэ көрдөһөбүн”, —— диэн өрөспүүбүлүкэ баһылыга бэлиэтээтэ.
Николаев дойду салгын суудуналарын лизинг бырагыраамаларын хаттаан көрөр наадатын туһунан иһитиннэрдэ. Кини этэринэн, лизинг төлөбүрдэрин төлөбүрүгэр субсидия кээмэйигэр 1,5-2 үрдэтэр көннөрөр коэффициени олохтуохха сөп. Бу Арассыыйаҕа оҥоһуллубут суудуналары туһанар авиахампаанньаларга дойду бырабыыталыстыбата көрөр лизиҥҥэ төлөбүрдэрин туһунан этиллэр. Айсен Сергеевич бу ньыма Уһук Илин федеральнай уокуругар тэриллиэхтээх биир кэлим авиа-тиэйээччигэ сыһыаннаан эмиэ туһаныллыан сөп диэтэ.
“Саха сирэ – суперджеттары хайы-үйэ туһанар Уһук Илиҥҥэ соҕотох эрэгийиэн. Биһиги балаансабытыгар – салгын 5 суудуната баар, быйыл өссө үһү ылыахпыт. Эбии ыларга бэлэммит, ол эрээри лизинг үчүгэй бырагыраамата наада”, —— диэн кини бэлиэтээтэ.
Мишустин Николаев этиитин өйөөтө уонна туһааннаах этиилэри Арассыыйа Федерациятын Бырабыыталыстыбатын бэрэссэдээтэлин оборона-бырамыысыланнас комплексын боппуруостарыгар солбуйааччы Юрий Борисов аатыгар ыытарга сорудахтаата.
Мунньахха Айсен Николаев Михаил Мишустиҥҥа нолуок саҥа эрэсииминэн уратылаах, страховой усунуостар ставкаларын биллэрдик аччатыыны ( 14 %-тан 7,6% диэри) уонна барыска нолуогу (20 %-тан 3% диэри) көрөр IT-салааны өйүүр миэрэлэрин, ону тэҥэ “сүрүннүүр песочницалар” диэни киллэрэр сокуону оҥоруу иһин махтанна. Бу көмөтүнэн IT-паарка резиденнэрэ буолуохтаахтар Арассыыйа быраабын уонна үлэҕэ сокуоннаһын уратыларыттан сылтаан АХШ-ка, Сингапурга, Гонкоҥҥа регистрацияламмат буолуохтара.
“Арҕаа дойдуга олоххо киирэр биисинэс Арассыыйаттан куоппатын туһугар олус үчүгэй усулуобуйалар. Бу салааҕа дьарыктанар Саха сирин хампаанньаларыгар бу табыгастаах буолуон сөп. Усулуобуйа эрэгийиэҥҥэ хайдах үлэлиирин туһунан кэлин кэпсииргитигэр уонна этиилэри киллэрэргитигэр көрдөһөбүн”, — диэтэ Мишустин.
Саха сирин баһылыга урутаан сайдыы цифровой сирин-уотун тэрийиигэ этии киллэрдэ, бу сүрүн сыалынан үрдүк технологиялаах биисинэһи сайыннарыыга усулуобуйалары тэрийии, Уһук Илиҥҥэ Арассыыйа уонна аан дойду биллэр хампаанньаларын арыйыы, үрдүк хамнастаах үлэ миэстэтин тэрийии буолар. Кини билигин туһаныллар урутаан сайдыы сирин-уотун эрэсиимэ резиденнэри чопчу миэстэҕэ үлэлииргэ баайарын, онон IT-эйгэтин хампаанньаларыгар резидент статуһун тэйиччиттэн ылар кыаҕы биэриэххэ сөп этэ, диэтэ. Николаев маннык миэрэлэри наукаҕа сыһыаннаах салааларга тэнитэргэ эттэ.
Саха Өрөспүүбүлүкэтин Ил Дарханын уонна
Саха Өрөспүүбүлүкэтин Бырабыыталыстыбатын пресс-сулууспата.
Бэлэмнээтэ Женни СТРЮКОВА
Хаартыска: тустаах саайтан