П.Ойуунускай аатынан Литература мусуойа Ийэ тыл уонна сурук-бичик күнүн дэкээдэтигэр кэккэ дьаһаллары ыытар.
edersaas.ru
Олунньу 12 күнүгэр сахалартан бастакы лингвист-учуонай, сахалыы маассабай суругу-бичиги төрүттээччи Семен Андреевич Новгородов төрөөбүтэ — 130, сахалыы бастакы букубаар тахсыбыта — 105, Саха АССР төрүттэммитэ 100 сылларыгар аналлаах “С.А.Новгородов айбыт алпаабыта – саҥа олох, саҥа кэм кэрэһитэ” диэн ZOOM-нан мусуой– уруогу тэрийдилэр.
Мусуой-уруогу Чурапчы улууһун Далан аатынан Кытаанах орто оскуолатын 8-с кылааһын, Э.К. Пекарскай аатынан Игидэй орто оскуолатын 9-с кылааһын үөрэнээччилэригэр мусуой үлэһитэ Ньургуйаана Викторовна Халгаева ыытта.
Онтон олунньу 12 күнүгэр күнүс 12 чаастан Литература мусуойугар куйаар ситиминэн төрдүс сылын ыытыллар Ноҕуруодап алпаабытынан дьыктаан суруйарга ыҥыраллар. Бэлэмнэнэргэ аналлаах Новгородов аатынан тиэкистэри, алпаабыты мусуой Инстаграмм сирэйигэр угуохтара.
Кыайыылаахтарга диплом, кыттыбыт дьоҥҥо туоһу суруктар туттарыллыахтара.
Надежда ЕГОРОВА, «Саха сирэ» хаһыат, edersaas.ru
Литература мусуойун хаартыскалара