Литература + Инстаграм = Бириистэ сүүй!

Бөлөххө киир:

Эдэр суруйааччылар XXI сүбэ мунньахтара кулун тутар 27-28 күннэригэр ыытыллар. Бу икки сылга биирдэ буолар тэрээһиҥҥэ сахалыы, нууччалыы тылынан проза, поэзия секцияларыгар эдэр ааптардар айымньыларын биллэр-көстөр суруйааччылар ырытыахтара, сүбэ-ама биэриэхтэрэ. Маны тэҥэ, үгэс курдук, хотугу норуоттар литератураларын секцията үлэлиир. Быйыл “Литературнай кириитикэ” уонна “Драма” секциялар эбилиннилэр, баларга сааһынан хааччахтааһын суох.

Сүбэ мунньаҕы көрсө, ыччат болҕомтотун тардар сыалтан, тэрийээччилэр – Саха сирин суруйааччыларын сойууһун иһинэн Эдэр литератордар сэбиэттэрэ интэриниэтинэн саҥа аахсыйалары таһаардылар. Усулуобуйалара сүрдээх судургу.

Кулун тутар 27 күнүгэр диэри олорор сиргитигэр баар суруйааччы пааматынньыгын, мусуойун, бюһун, мемориальнай дуоскатын аттыгар хаартыскаҕа түһэн бараҥҥыт, Инстаграм ситимигэр угаҕыт. Онно  #мин_уонна_суруйааччы ону тэҥэ  #эдэрсуруйааччылар_сүбэмунньахтара2018 хэштегтэри туруораҕыт. Инстаграмҥа @ederliterator аккауҥҥа хайаан да суруйтарбыт буолуохтааххыт. Кыайыылааҕы Random сыһыарыы көмөтүнэн талаллар. Ол эбэтэр, ким баҕарар кыайыан сөп. Кулун тутар 27 күнүгэр, “Живой автограф” поэзия киэһэтигэр кыайыылаахтарга тэрээһин спонсордара – “ЯЗолото” ювелирнай фирма, Yakutian Brands cаха быһаҕын маҕаһыына, “Көмүөл” кинигэ кыһата уонна Саха сирин суруйааччыларын сойууһа туруорбут бириистэрин үөрүүлээх быһыыга-майгыга туттарыахтара.

Иккис аахсыйаҕа кыттар буоллаххытына, бэйэҕит айбыт хоһооҥҥутун, эбэтэр кэпсээнтэн быһа тардыыны биир мүнүүтэ устата камераҕа уус-ураннык ааҕан баран, эмиэ Инстаграмҥа таһаараҕыт. #мин_айымньым диэн уонна #эдэрсуруйааччылар_сүбэмунньахтара2018 хэштегтэри туруораҕыт. Инстаграмҥа @ederliterator аккауҥҥа хайаан да суруйтарбыт буолуохтааххыт. Ким баҕарар кыттара көҥүл. Кыайыылааҕы дьүүллүүр сүбэ быһаарар. Кулун тутар 28 күнүгэр, сүбэ мунньаҕы түмүктүүр, “Молодые голоса” поэзия киэһэтигэр кыайыылаахтарга тэрээһин спонсордара – “ЯЗолото” ювелирнай фирма, Yakutian Brands cаха быһаҕын маҕаһыына, “Көмүөл” кинигэ кыһата уонна Саха сирин суруйааччыларын сойууһа туруорбут сыаналаах бириистэрин үөрүүлээх быһыыга-майгыга туттарыахтара.

Ангелина Васильева, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0