![](https://edersaas.ru/wp-content/uploads/2020/01/litsej-1.jpg)
Өрөспүүбүлүкэтээҕи лиссиэй-интэринээккэ үөрэнээччилэр истэрэ ыалдьыбытын туһунан сурах Интэриниэт-саайтарга тарҕаммыта.
edersaas.ru
Бу туһунан лиссиэй дириэктэрэ Иван Шамаев маннык хардарда:
“… Төрөппүттэр балаһыанньаны оҕолоруттан уонна иитээччилэртэн истэ сылдьар буоланнар, улаханнык аймамматахтара. Хата, оскуоланы кытары сибээһэ суох эрээри, оскуола туһугар ыалдьар үтүө санаалаах дьон ордук долгуйбуттара, миэхэ суруйбуттара, төлөпүөнүнэн эрийбиттэрэ.
Тохсунньу 29 күнүгэр үлэбэр тиийбиппэр, “үс оҕо иһэ ыалдьан поликлиникаҕа көрдөрө тиийдэ, онон, поликлиникалар түрбүөн таһаардылар” диэн кэпсии тоһуйбуттара. Аны сорох кылаас оҕолоро сотору-сотору наадаларыгар тахсаллар диэн буолбута. Биһиги «ыарыйдым» диэбит оҕолору барыларын тута биир кылааска муспуппут, испииһэккэ 44 оҕо буолбута. Тута Үөрэх министиэристибэтигэр сүрүннүүр үлэһиппитигэр, Роспотребнадзорга эрийбиппит. Дьэ, онтон тустаах тэрилтэлэр тиийэн кэлбиттэрэ.
Сыстыганнаах ыарыылары көрөр, эмтиир быраас бэҕэһээ кэлэн, интэринээт 39 оҕотун (сороҕу «ыалдьыбытым» диэбитинэн, сороҕу хантаактааххыт диэн) туспа этээскэ көһөртөрбүтэ (изоляция). Аны туран, хас да оҕо: “Мин ыалдьыбаппын, үөрэхпэр барыам этэ», — диэбитин да иһин, быраас испииһэр киирбит оҕо анаалыс түмүгүн кэтэһэригэр тиийэр.
Оҕолор бүгүҥҥү туруктарын туһунан этэр буоллахха, үс оҕо иһэ ыалдьар, үс оҕо ОРВИ диагнозтаах. Анаалыстар түмүктэрэ оптуорунньукка биллиэхтэрэ. Онуоха диэри тугу да быһаарар, этэр кыахпыт суох. Үлэ салҕанар”.
Надежда ЕГОРОВА, “Саха сирэ”, edersaas.ru
Хаартыска Интэриниэттэн туһанылынна