Ил Дархан Айсен Николаев Анал этиитин өрөспүүбүлүкэ олохтоохторо үлэлэригэр, дьиэлэригэр олорон, бэркэ интэриэһиргээн иһиттилэр.
edersaas.ru
Хаҥалас улууһун Хоточчу нэһилиэгин олохтооҕо, бибилэтиэкэр идэлээх Лира Яндреева Ил Дархан этиитин истэн баран санаатын үллэстэр:
— Аҕа баһылык этиитин күнүскү эбиэт кэмигэр түбэһиннэрэн эппитэ — саамай тоҕоостоох бириэмэ. Мин, холобура, эбиэппэр кэлэн олохтоохтук иһиттим. Айсен Николаев бу уустук кэмҥэ сыстыганнаах дьаҥтан хаарыаннаах дьоммутун сүтэрбиппитин бэлиэтээн, Анал этиитин доруобуйа туругуттан саҕалаан баран, кэлэр сылы Доруобуйа сылынан биллэрэн түмүктээбитин биһирии ылынным.
Олох бары тирээн турар боппуруостара бары хабылыннылар. Ол онтон, мин санаабар, үгүс дьон, биллэн турар, доруобуйа харыстыбылыгар сыһыаннаах боппуруостары чорбоппуттара буолуо дии саныыбын. Ол курдук, аныгы үйэ буолан цифровой технология сайдан, коронавирус инфекциятын бохсууга улахан көдьүүһү аҕалбыта көһүннэ. Ил Дархан бэрт элбэх анаалыс ылар лаборатория аһыллыбытын бэлиэтээтэ. Холобура, аҥардас көмпүүтэр томографиятын да ылан көрдөххө, үгүс киһи бу аппараат туһунан эндэппэккэ билэр буолла. Аҕа баһылык Анал этиитин саҕалыырыгар бастаан утаа дьаҥы мэдиссиинэбит бэлэмэ суох көрсүбүтүттэн саҕалаан баран, билигин цифровой технологияны баһылааһын түмүгэр ыарыыны бохсуу үлэтэ тэтимирдэ диэбитин кытта сөпсөһөбүн.
Онон саамай тыҥааһыннаах кэми арыый аһардан, өйдүүн-санаалыын бу дьаҥы ылынан, аны салгыы хайдах коронавирус инфекциятын суох оҥорууга дьулуһуохтаахпыт. Онуоха эһиилги Доруобуйа сыла өйөбүл буоларыгар эрэнэбин.
Елена ПОТОЦКАЯ, «Саха сирэ» хаһыат, edersaas.ru