Лиидэр кыргыттар пуорумнара актыбыыс кыргыттары түмэр, сонун сүүрээни тобуларга көҕүлүүр. edersaas.ru
Анастасия Оконешникова уонна Анисья Спиридонова иккиэн атын-атын улуустан сылдьаллар. Анастасия — Намтан, Анисья — Кэбээйиттэн. Лиидэр кыргыттар хас да сыллааҕыта «Синергия» пуорумҥа сылдьан билсибиттэр.
Онтон сыл аайы уопсастыбанньык кыргыттар пуорумнарыгар көрсөр буолбуттар. Икки тус-туспа эйгэлээх эдэркээн лиидэр дьахталлары олоххо көхтөөх буолуу, сонун сүүрээннэри, бырайыактары олоххо киллэрии ситимниир. Анастасия улуустааҕы Биэнсийэ пуондатыгар буҕаалтырдыыр, Анисия — нуучча тылын учуутала. Кыргыттар бэйэ-бэйэлэрин кытта өрүү социальнай ситимнэринэн билсэ олороллор. Лиидэр кыргыттар пуорумнарыгар түөрт былаһаакканан сылдьан, бэрт элбэҕи биллилэр.
«Дьиэбитигэр тиийэн, холкутук тугу билбиппитин-көрбүппүтүн ырытыһан баран, уопут атастаспыт дьон быһыытынан саҥа бырайыактары толкуйдуохпут», — диэн сэһэргэһээччилэрим санааларын үллэстэллэр.
Онон киһи бу үөрэ-көтө турар лиидэр кыргыттары да кытта кэпсэтэн баран, пуорум сыалын-соругун толору ситтэ диэн түмүккэ кэлэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа уонна видеоҕа ааптар түһэриитэ уонна устуута.