Ааспыт субуотаҕа Уфаҕа «Терра Башкирия» диэн Башкортостан өрөспүүбүлүкэтин баһылыгын бирииһигэр ат сүүрдүүтэ ыытылынна. Манна кыайыылааҕынан Саха сириттэн сылдьар жокей Александр Лиханов буолла диэн sportyakutia.ru саайт иһитиннэрэр.
«Терра Башкирия» күрэхтэһиигэ сүүмэрдиир 12 түһүмэххэ кыайбыттар кытыннылар. Пандемия буолан, күрэхтэһии биир даҕаны көрөөччүтэ суох барда, ол оннугар быһа эпииринэн тэлэбиидэнньэҕэ көрдөрдүлэр.
Күрэхтэһии «Акбузат» ипподромҥа буолла. Финалга Туймазинскай оройуон аатыттан ат сүүрдүбүт саха жокейа Александр Лиханов кыайыылаах таҕыста. Кини сүүрдүбүт Реактивити диэн ата 2400 миэтэрэҕэ 2:43:2 бириэмэнэн кэллэ.
Бэлиэтээн суруйдахха, Реактивити бу иннинэ ханнык даҕаны күрэхтэһиигэ бастыы сылдьыбатах эбит. Жокейбыт Александр Лиханов, тириэньэр Флюр Батыров уонна ат хаһаайына Радик Нареев эрэгийиэн баһылыгыттан Радий Хабировтан сүрүн бирииһинэн уонна 250 тыһыынча солкуобайдаах сэртипикээтинэн наҕараадаланнылар. Күрэхтэһии бирииһин пуондата — 500 тыһыынча солкуобай.
Саха сирин жокейа Александр Лиханов бу сезоҥҥа үрдүк кылаастаах уонна таһымнаах көрдөрүүлэрдээх. Бу сайын кини маастар-жокей нуорматын толорбута. Оттон бу Уфатааҕы кыайыы Лихановка быйыл сайын номнуо тохсус кыайыыта буолар. Кини ат сүүрдүөҕүттэн 3 131 399 солкуобай бирииһи ылбыта биллэр.
Александр Посельский, Sportyakutia.ru