Саха сирин көхтөөх кыргыттарын икки нэдиэлэлээх үлэтэ форумунан түмүктэннэ. Манна сүүрбэ үс улуустан, Дьокуускай куораттан үс сүүсчэкэ кэрэ аҥар кытынна. Тэрээһин Надежда Тихонова тылларыгар “Сахам кыргыттара түмсүөҕүҥ” диэн өрөгөй ырыатынан саҕаланна. «Саха сирэ» хаһыат, edersaas.ru
Кыттааччыларга анаан Ыччат дьыалаларыгар уонна дьиэ кэргэн бэлиитикэтигэр миниистири бастакы солбуйааччы Василина Лукина — “Салайааччы кыыс”, педагогическэй институт магистрана Екатерина Жиркова — “Саҥарар-иҥэрэр дьоҕур”, оҕо, дьиэ кэргэн психолога Анна Сергеева — “Дьиэ кэргэн дьоло”, трненердэр Марияанна Васильева уонна Гилян Сангаджиева — “Кроссфит, чэпчэки атлетика тиэхиньикэтэ”, Транспортнай техникум дириэктэрин солбуйааччы Галина Тен — “Бириэмэни сөпкө аттарыы”, эндокринолог-быраас Татьяна Сунхалырова — “Сөпкө аһааһын”, педиатр-быраас Людмила Маринова — “Ийэ уонна оҕо доруобуйата” диэн тиэмэлэргэ лиэксийэ аахтылар. Уйулҕа үөрэхтээхтэрэ, гинеколог-быраастар, косметологтар, юристар үлэлээтилэр. Илиинэн оҥоһук дьаарбаҥката буолла.
Систиэмэлээх үлэ ситиһиилээх
Биир сыл анараа өттүгэр СӨ Дьахталларын Сойууһун иһинэн тэриллибит Нинель Малышева бэрэссээдээтэллээх Лидер-кыргыттар уопсастыбаннай түмсүүлэрэ бу кэм устата киэҥ далааһыннаах уонна, саамай сүрүнэ, систиэмэлээх үлэни ыыппыта харахха тута быраҕыллар. Дьокуускай куорат эрэ иһинэн буолбакка, Нам, Хаҥалас, Мэҥэ Хаҥалас, Уус Алдан, Абый, Горнай оройуоннарынан миэстэтигэр кыргыттар түмсүүлэрин тэрийбиттэр. Кыргыттар маннык бырайыактарынан үлэлииллэр: “Ситиһии эйгэтэ”, “Дьиэ кэргэн – дьол төрдө”, “Доруобуйа уонна кэрэ буолуу кистэлэҥэ”, “Дьахтар доруобуйата”, “Айар мастарыскыай”, “Быраабы билии”, “Дьиэ кэргэн уонна быраап”. Форум түмүгүнэн кыттааччылар улуустарга, нэһилиэктэргэ кыргыттары түмэр үлэни өссө күүскэ ыытарга сүбэлэстилэр. Гражданскай уопсастыба институттарын сайыннарыы миниистирин бастакы солбуйааччы Савва Михайлов Саха сиригэр тыһыынча кэриҥэ саамай актыыбынай түмсүүнү кэрэ аҥардар салайалларын бэлиэтээтэ. Итиэннэ өрөспүүбүлүкэҕэ, нэһилиэктэргэ баар аҕалар түмсүүлэрин кытта тэҥҥэ үлэлэһии үтүө түмүктээх буолуоҕун саарбахтаабатын эттэ.
[vc_masonry_media_grid element_width=»6″ grid_id=»vc_gid:1488018784039-ef3a1fa7-b376-7″ include=»19074,19073″]Саха улуу дьахталларын үйэтитэллэр
Көлүөнэлэри ситимниир итиэннэ өрөспүүбүлүкэ сайдыытыгар уһулуччу өҥөлөөх кэрэ аҥардар ааттарын үйэтитэр сыаллаах “Саха сиригэр дьахталлар хамсааһыннарын чулуулара” диэн бэлиэ олохтонно. Бэлиэни араас номинациянан уопсастыбаннай олоххо көхтөөх, ситиһиилээх лидер-кыргыттарга СӨ Дьахталларын сойууһун бочуоттаах бэрэссэдээтэлэ Валентина Кириллина, СӨ Дьахталларын сойууһун бэрэссэдээтэлэ Анжелика Андреева, “Барҕарыы” национальнай пуонда дириэктэрэ Альбина Поисеева туттардылар.
- Евдокия Саввина аатынан өйдөбүнньүк бэлиэни — “Кэрэ куо” портал редактора Туйаара Алааска;
- Александра Овчинникова аатынан өйдөбүнньүк бэлиэни – Лидер-кыргыттар түмсүүлэрин “Дьиэ кэргэн — дьол төрдө” хайысхатын салайааччыта, ХИФУ исписэлииһэ Анна Сергееваҕа;
- Татьяна Дмитриева аатынан өйдөбүнньүк бэлиэни — Лидер-кыргыттар түмсүүлэрин “Дьахтар доруобуйата” бырайыак салайааччыта Мария Масловаҕа;
- Нина Протопопова аатынан өйдөбүнньүк бэлиэни – «Эдэр саас» хаһыат уонна edersaas.ru сайт редактора Надежда Самсоноваҕа;
- Светлана Николаева аатынан өйдөбүнньүк бэлиэни — “УНЦИЯ” хампаанньа генеральнай дириэктэрэ Нюргуяна Заморщиковаҕа;
- Любовь Ильчук аатынан өйдөбүнньүк бэлиэни – эксклюзивнай таҥас шоу-румун хаһаайката Жанна Нестероваҕа;
- Антонина Петрова аатынан өйдөбүнньүк бэлиэни – ХИФУ биолог-учуонайа, Ил Дархан гранын хаһаайката Ксения Наумоваҕа;
- Вера Захарова аатынан өйдөбүнньүк бэлиэни — “Якутия” авиахампаанньа эдэр исписэлиистэрин түмсүүтүн актыбыыһа Мария Стручковаҕа;
- Елизавета Бурцева аатынан өйдөбүнньүк бэлиэни – Лидер-кыргыттар түмсүүлэрин “Кыыс бэйэни сайыннарыыта” хайысхатын салайааччыта, ХИФУ наукаҕа управлениетын сүрүн исписэлииһэ Оксана Лугиноваҕа;
- Анастасия Варламова аатынан өйдөбүнньүк бэлиэни – Сунтаар 1 №-дээх оскуолатын дириэктэрин иитэр үлэҕэ солбуйааччы, Лидер-кыргыттар гимнэрин ааптара Надежда Тихоноваҕа;
- Анна Мордовская аатынан өйдөбүнньүк бэлиэни – биолог-учуонай, Ил Дархан гранын хаһаайката Мария Хандыга.
Лидер-кыргыттар түмсүүлэрин бэрэссэдээтэлэ Нинель Малышева интервьютун манна ааҕыҥ.
Форум туһунан кыттааччылар санаалара манна баар.
Түмсүү хайдах тэриллибитин туһунан сиһилии манна аах.
Форум туһунан нууччалыы манна баар.
Инстаграмҥа — @devushki_lidery_ykt
Электроннай аадырыс — lideryykt@bk.ru
«Саха сирэ» хаһыат, edersaas.ru
Хаартыска: Елена Потоцкая, Надежда Самсонова түһэриилэрэ уонна соц.ситимтэн.