Сунтаарга биһиги уопсастыбаннай кэрэспэндьиэммит Борис Потапов биллиилээх ыанньыксыт, “Үлэ Албан аата” уордьан толору кавалера Владимир Михайлов туһунан кинигэтин биһирэмэ буолла.
edersaas.ru
—Кинигэм Тыа хаһаайыстыбатын министиэристибэтин үбүлээһининэн, “Саха сирин үлэһит дьоно” диэн сиэрийэнэн “Бичик” кинигэ кыһатыгар 250 ахсаанынан таҕыста, — диир Борис Афанасьевич. — Быйыл “Кириэстээх” кэпэрэтиип уонна улуус дьаһалтата кыттыһаннар, Владимир Африкановичка 65 сааһынан аныгылыы тииптээх саҥа дьиэни тутан биэрбиттэрэ. Оттон Үлэ Дьоруойа 50 сыл устата ыанньыксыттаабытын үрдүктүк сыаналаан, министиэристибэ маннык бэлэҕи оҥордо.
Сэттэ олуктан турар кинигэҕэ Владимир Африканович хайдах усулуобуйаҕа үөскээн-төрөөн киһи кэрэмэһэ, үлэһит үтүөтэ буолбутун, түөрт тыһыынчалаах, биэс тыһыынчалаах кирбиини ылар иһин социалистическай күрэхтэһиигэ кыттыбытын туһунан бииргэ үлэлээбит дьонун ахтыыларынан, улуустааҕы “Ильич уоттара” уонна өрөспүүбүлүкэтээҕи “Эдэр коммунист” хаһыаттарга тахсыбыт ыстатыйаларынан сырдатыллар. Ааптар Горбачев саҕанааҕы уларыта тутуу сылларын, хаһаайыстыбаннай ахсаан ньыматынан тэриллибит үлэни-хамнаһы, 1990-с сыллардаах тургутуу итиэннэ билиҥҥи кэм тустарынан оҥорбут ырытыыта ааҕааччы үгүс мунаахсыйар ыйытыыларыгар чопчу харданы биэрэр.
Үлэ түмүгэ көстүбэт, хамнас диэн суох ыарахан кэмнэрин тулуйбакка, үгүстэр уурайбыт буоллахтарына, Африканович үлэлээбитин курдук үлэлии-хамсыы сылдьыбыта атыттарга холобур уонна кэпэрэтиип атаҕар турарыгар тирэх буолбутун бэлиэтиир. Саха төрүт дьарыгын — ынах сүөһүнү иитиини өрө тутан, үрдүк кирбиилэри ситиспит Дьоруой ыанньыксыт туһунан кинигэ ааҕааччы киэҥ араҥатыгар, чуолаан үүнэн иһэр ыччакка ананар.
Раиса Сибирякова, «Саха сирэ» хаһыат, edersaas.ru