Үлэтэ суох ыччакка анаан “Траектория карьеры” диэн онлайн-дьаарбаҥка тохсунньу 27-28 күннэригэр буолуоҕа. Оччотугар Саха сирин уонна Уһук Илин эрэгийиэннэрин хампаанньаларыгар үлэҕэ киириэхтэрин сөп.
Бу маннык дьаарбаҥка сыл ахсын ыытыллар, ол эрээри быйыл аан бастаан онлайн көрүҥүнэн буолуоҕа. Дьаарбаҥкаҕа маастар-кылаастар, туһалаах вебинардар эмиэ ыытыллыахтара.
Нэһилиэнньэ дьарыктаах буолуутун хааччыйар судаарыстыбаннай кэмитиэт бэрэссэдээтэлэ Степан Москвитин иһитиннэрбитинэн, дьаарбаҥкаҕа 600-тэн тахса үлэни биэрээччи үс тыһыынча кэриҥэ үлэ миэстэтин таһаарыаҕа.
Манна араас хайысха барыта баар буолуоҕа: үөрэх, култуура, спорт, оччугуй биисинэс, тырааныспар уонна суол хаһаайыстыбата, бырамыысыланнас, тутуу, олох-дьаһах хомунаалынай хаһаайыстыбата, айылҕа харыстабыла, доруобуйа харыстабыла, IT-индустрия, о.д.а.
Дьаарбаҥка ZOOM платформаҕа, ону тэҥэ, Дьарыктаах буолуу киинин ютуб-ханаалыгар ыытыллыаҕа. Резюмелары workyakutia@mail.ru электроннай аадырыһынан ыытыаххытын сөп.
Ангелина Васильева, “Саха сирэ” хаһыат, edersaas.ru
Хаартыска: СИА