Нэһилиэнньэ дьарыктаах буолуутун сулууспата үлэтэ суох дьон үлэ буларыгар көмөлөһөр, куурустарга үөрэтэр. 2019 сылтан “Демография” национальнай бырайыак иитинэн “Аҕа көлүөнэ” уонна быйылгыттан кыра оҕолоох ийэлэр үлэлэрин уонна оҕо көрөллөрүн холбоон үөрэхтээһин бырагырааматыгар кытталлар.
Саха сиринээҕи нэһилиэнньэ дьарыктаах болуутун судаарыстыбаннай кэмитиэтин идэҕэ үөрэтэр салаатын салайааччыта Мария Бурцева “Саха” НКИХ ыытар “Талбан” биэриитигэр иһитиннэрбитинэн, тустаах бырагыраамаҕа олоҕуран, ааһан эрэр сылга 203 кыра оҕолоох ийэ, 52 аҕа саастаах киһи үөрэммит. Уопсайынан, быйыл тустаах кэмитиэт иһинэн 2600 киһи үөрэммит.
Саха сиригэр былырыын 8 тыһыынчаттан тахса киһи үлэтэ суоҕунан учуокка турар эбит буоллаҕына, быйыл ити сыыппара 30910 киһиэхэ тэҥнэспит. Бу пандемиянан кытта сибээстээҕэ чахчы.
Нэһилиэнньэ дьарыктаах буолуутун сулууспата араас хайысханан үлэлиир, уонтан тахса судаарыстыбаннай өҥө баар эбит. Холобура, быстах уопсастыбаннай үлэнэн хааччыллыахтарын сөп. Эбэтэр бэйэ дьарыктаах буолуутун бырагырааматын иитинэн биисинэс-бырайыактарын көмүскээн, субсидия ылан дьарыктаныахтарын сөп. Аны букатын үлэ кыайан булбат дьону психологическай өттүнэн өйүүллэр.
Нэһилиэнньэ дьарыктаах буолуутун кииннэрэ дьаҥынан сибээстээн, билигин ыраахтан олорон үлэлииллэр. Онон сайабылыанньаларын 508-800 эбэтэр Трудвсем.ру портал нөҥүө биэрэн учуокка туруохтарын, үлэ көрдүөхтэрин сөп.
Людмила ПОПОВА, “Саха сирэ” хаһыат, edersaas.ru
Хаартыска: sch.msr.mosreg.ru