Уопсастыба

Үлэтэ суох дьахтар төһө элбэҕий?

Дьокуускайга “Нэһилиэнньэ дьарыктаах буолуутун киинэ” кэлэн иһэр Аан дойду дьахталларын күнүгэр анаан, кэрэ аҥардарга үлэ дьаарбаҥкатын тэрийдэ.
Дьаарбаҥкаҕа 11 тэрилтэ 58 үлэ миэстэтин билиһиннэрдэ. «Дьокуускайдааҕы килиэп комбината» АУо,  “Бизнес-партнер” ХЭУо,  “Дьокуускай аэропорда” АУо,  “СахаНьюГрупп” ХЭУо, СӨ Федеральнай сулууспа Госстатистикатын территориальнай уоргана, оҕо кииннэрэ о.д.а. тэрилтэлэр кыттыыны ыллылар. Куоракка сүрүннээн туох үлэһиттэр наадаларын, ханна үлэ элбэҕин ыйыталастым.

Варвара Попова, edersaas.ru, “Саха сирэ” хаһыат.

Уопсай туругу көрдөххө, ордук тутар тэрилтэлэр үгүс үлэһиккэ наадыйаллара билиннэ. Онтон доруобуйаны харыстыыр тэрилтэлэргэ быраастар, медсиэстэрэлэр тиийбэттэрэ бэлиэтэнэр. Үсүһүнэн, транспорт уонна сибээс хайысхата турар. Дьахталларга анаан бу күн тэрилтэлэр бухгалтер, юрист, худуоһунньук-дизайнер, программист, үлэ көмүскэлин иниспиэктэрэ, кадр иниспиэктэрэ, повар, товаровед, экономист, куукуна үлэһитэ, фельдшер, менеджер, дьиэ сууйааччы о.д.а. үлэһиккэ наадыйалларын биллэрдилэр.
Дьаарбаҥкаҕа 200-тэн тахса үлэ көрдүүр дьахтар кытынна. Кинилэргэ анаан резюмены хайдах суруйарга көмө, психолог сүбэтэ, эбии үөрэхтээһин туһунан сырдатыы тэрилиннэ, бэйэ дьыалатын хайдах арыйарга ыйыы-кэрдии оҥоһулунна.
Үлэ көрдүүр дьахталлар ортолоругар сүрүннээн үөрэҕи саҥа бүтэрбиттэр, кыра оҕолоох ийэлэр, биэнсийэлээхтэр бааллар. Сокуон быһыытынан дьүһүнүттэн, омугуттан, сааһыттан, ханнык итэҕэли тутуһарыттан көрөн дискриминациялааһын суох буолуохтаах. Ол эрээри, холобур, үлэ көрдүү кыра оҕолоох, орто саастаах, биэнсийэлээх үс дьахтар тэҥинэн кэллэҕинэ, үлэнэн хааччыйааччы кими ылара бэйэтин бырааба. Үһүгэр диэри саастаах оҕолоох ийэлэргэ, биэнсийэлээх дьахталларга дьарыктаах буолуу киинэ эбии үөрэхтээһини босхо тэрийэн ыытар. Ол бырагырааманан, хомойуох иһин,  былырыыҥҥытааҕар быйыл аҕыйах дьахтар хапсан үөрэниэҕэ. Миэстэни элбэтэр туһунан боппуруос быраабыытылыстыба таһымар быһаарылла сылдьар.
Бүгүҥҥү күннээҕи туругунан 1093 киһи үлэтэ суоҕуттан – 609 дьахтар. Нэһилиэнньэ дьарыктаах буолуутун киинигэр учуокка турааччылар государствоттан көмө харчы ылаллар. Ол курдук, куорат үрдүнэн харчы алын кээмэйэ — 1190 солк., үрдүк кээмэйэ 6860 солк. тэҥнэһэр.
Дьахталларга анаммыт үлэ дьаарбаҥкатын түмүгүнэн, төһө киһи үлэҕэ киирбитэ биир ыйынан биллиэҕэ.

Варвара Попова, edersaas.ru, “Саха сирэ” хаһыат.

0
0

Добавить комментарий