Уопсастыба

Үлэтэ суох буолууттан көмүскэнэр күн тэрээһиннэрэ




Арассыыйаҕа ыам ыйын 21 күнүгэр Үлэтэ суох буолууттан көмүскэнэр күнү бэлиэтииллэр. Дьокуускайга бу күн Дьарыктаах буолуу киинэ информационнай акцияны ыытта. Онно 200-тэн тахса киһи кыттыыны ылла.
Ангелина Васильева, “Саха сирэ” хаһыат, edersaas.ru

Акция чэрчитинэн, вакансия дьаарбаҥката ыытылынна. Манна Дьокуускайдааҕы килиэп оҥорор кэмбинээт, 1-кы №-дээх өрөспүүбүлүкэтээҕи балыыһа, 36-с №-дээх оскуола, о.д.а. бөдөҥ тэрилтэлэр кытыннылар. Кинилэр диспетчер, куруусчут, суоппар, санитарка, сиэстэрэ вакансияларын таһаардылар.
54 киһи дьаарбаҥкаҕа кэлэн, үлэ көрдүүрүн биллэрдэ. Кинилэртэн 15 киһини тэрилтэҕэ кэлэн билсэргэ, кэпсэтэргэ ыҥырдылар.
Ону тэҥэ, “Олохтоох каадырдары – бырамыысыланнаска” диэн бырайыак чэрчитинэн, көмүһү уонна чоҕу хостуур тэрилтэлэргэ үлэһиттэри көрдөөтүлэр. Манна 44 киһи үлэлии барар баҕалааҕын биллэрдэ.
“Үлэ көрдүүргэ аныгылыы ньыма” диэн идэҕэ туһаайар семинар-практикум ыытылынна.
Үлэтэ суох буолууттан көмүскэнэр күн 1992 сыллаахха олохтоммута.

Билигин өрөспүүбүлүкэҕэ 37 тыһыынча үлэтэ суох киһи баар. Дьокуускайга Дьарыктаах буолуу киинигэр учуокка турбут дьон кырата 1190 солк., саамай үрдээбитэ 6860 солк. суумалаах босуобуйа ылаллар. Босуобуйа төлөнөр кэмэ үлэ ыстааһыгар ааҕыллар. Дьарыктаах буолуу киинэ үөрэххэ ыыппыт буоллаҕына, истипиэндьийэ төлөнөр.
Билиҥҥэ кэмҥэ үлэтэ суох буолууттан көмүскэнии босуобуйанан эрэ муҥурдаммат. Дьарыктаах буолуу киинэ судаарыстыбаннай өҥөлөрү оҥорор, үлэ буларга көмөлөһөр, ону тэҥэ, иһитиннэрэр-биллэрэр дьайыылаах.

Ангелина Васильева, “Саха сирэ” хаһыат, edersaas.ru

0
0

Санааҕын суруй