Леонид Филиппов — «Дыгын оонньууларын» кыайыылааҕа!

Бөлөххө киир:

Бэҕэһээ-бүгүн, ахсынньы 5-6 күннэригэр, Дьокуускай куорат «Өрөгөй» успуорт комплексыгар «Дыгын оонньуулара» ыытылынна. Икки эрийсиилээх, тыҥааһыннаах күн түмүгүнэн кыайыылааҕынан Амматтан Леонид Филиппов буолла!

Иккис күн быһаарыылаах сэттис түһүмэҕинэн — таас көтөҕүүтэ. Манна сэрэбиэй быраҕыллыбат. Хапсаҕайга бүтэһик миэстэни ылбыт уол бастакынан тааһы көтөҕөр. Ыһыах кэмигэр уолаттар сымара тааһы көтөҕөр эбит буоллахтарына, бу сырыыга 105 киилэлээх кумахтаах куулу көтөхтүлэр.

Бу көрүҥү «Дыгын оонньуларын» хас даҕаны төгүллээх чөмпүйүөнэ Николай Дьяконов: «Кумахтаах тааһы көтөҕөн хаамыы уһун уолаттарга уустук буолуо, куул субуллан түһэ турар. 

Манна диэн эттэххэ, лиидэр уолаттарбыт баһылаабыт көрүҥнэригэр мөлтөөн биэрдилэр. Арай, Леонид Филиппов бэйэтин көрүҥнэригэр бастыҥын курдук бастыҥ. 

Уопсайынан диэн эттэххэ, көрүҥ уларытыытын киллэрэллэрэ буоллар, кулун тардыһыыны киллэрэн, оҕунан ытыыны устуом этэ. Оччоҕуна 80-90 киилэлээх улахан уолаттар эрэ киирсиэхтэрэ этэ«, — диэн санаатын эттэ.

Бүтэһик түһүмэххэ Таас Боотур диэн ааты ылбыт Дьулустаан Ноговицын 201 миэтэрэҕэ кумахтаах куулу иттэ.

Онон, тааһы көтөҕүүгэ түмүк маннык буолла:

1 миэстэ — Дьулустаан Ноговицын — 201, 30 м

2 миэстэ —Егор Филиппов — 200, 00 м

3 миэстэ —Владимир Федоров — 164, 19 м

Дьэ, онон икки күн устата ыытыллыбыт күөн күрэскэ уолаттар бары ох курдук оҥостон кэлэннэр, эрбии тииһин курдук эгил-тэгил киирсиилэрин түмүгэр Амма Болугуруттан сылдьар Леонид Филиппов кыайыылааҕынан таҕыста. Кини «Прогресс» тутуу тэрилтэтин генеральнай дириэктэрэ Алексей Пинигин туруорбут 1 мөлүйүөн солкуобайынан наҕараадаланна.

Бу иннинэ Леонид 2019 сыллаахха ыытыллыбыт «Дыгын оонньууларыгар» үһүс миэстэни ылбыта.


Оттон иккис миэстэни Артем Варданян, ааспыт оонньууларга түөрт сыл субуруччу кыайбыт Егор Филиппов үһүс буолары ситистилэр.

Күрэхтэһии уопсай түмүгүн көрүҥ:

edersaas.ru

+1
0
+1
0
+1
0
+1
0
+1
0
+1
0
+1
0