Бүгүн, от ыйын 22 күнүгэр, Саха сирин наукатын академиятын салайааччытын э.т. Сергей Попов үлэтиттэн тохтоото. Кини оннугар Ил Дархан ыйааҕынан Леонид Владимиров бэрэсидьиэн э.т. ананна.
Санатан эттэххэ, физико-математическай наука дуоктара Сергей Вячеславович Попов бэс ыйыгар Василий Филиппов кэнниттэн салайааччы эбээһинэһин толорооччунан анаммыта.
Ыспыраапка:
Леонид Николаевич Владимиров — биологическай наука дуоктара, профессор, Арассыыйа наукатын академиятын чилиэн-корреспондена, СӨ Наукатын академиятын чилиэнэ.
Кини 1959 сыллаахха Тулагы-Киллэм нэһилиэгэр төрөөбүтэ. Саха судаарыстыбаннай университетын тыа хаһаайыстыбатын факультетын үөрэнэн бүтэрбитэ. К.И.Скрябин аатынан Москватааҕы ветеринария академиятыгар, Дьокуускайдааҕы тыа хаһаайыстыбатын институтугар үлэлии сылдьан кандидатскай диссертациятын көмүскээбитэ. Дьокуускайдааҕы тыа хаһаайыстыбатын академиятын проректорынан, 1997 сылтан ректорынан үлэлээбитэ. 2000 сыллаахха докторскай диссертациятын көмүскээн профессор буолбута.
2016 сылтан ДьТХА профессор-консультанынан, СӨ күндү металларын, таастарын кэмитиэтин генеральнай дириэктэрин бастакы солбуйааччынан үлэлээбитэ, 2019 сылтан М.Г.Сафронов аатынан Саха сиринээҕи тыа хаһаайыстыбатын научнай-чинчийэр институтун дириэктэринэн анаммыта.
Дьокуускай куорат Дууматын I, II ыҥырыытын, Ил Түмэн III, IV, V ыҥырыылаах мунньаҕын дьокутааттара. РФ бэрэсидьиэнэ Владимир Путин дэбиэриннэй киһитэ. РФ, СӨ наукаларын үтүөлээх деятеллэрэ.
Аграфена КУЗЬМИНА