Бэс ыйын 8 күнүгэр Дьокуускайга “Өрөгөй” спорт киинин түһүлгэтигэр саха төрүт оонньуутугар — хапсаҕайга “Азия Куубага” диэн улахан турнир буолаары турар. Бу күрэскэ бөҕөстөр хамаандаларынан 63, 75 уонна 95 киилэҕэ диэри ыйааһыннарга күүстэрин холоһуохтара.
Аҕыйах хонуктааҕыта “Инстаграм” социальнай ситимҥэ “бастакы айар киэһэбин 21 киһи эрэ көрө кэллэ, аны ыллаан бүттүм” диэн эдэр ырыаһыт Леонид Григорьев-Леон биллэрии оҥорон “хайп” тардыбыта. Леон спордунан утумнаахтык дьарыктанар, “Дыгын оонньууларын” икки төгүллээх кыттыылааҕа, атах оонньуутугар спорт маастара буолар. Кини, аны, биллэр вайнерга Өттүк Лехаҕа “Азия Куубагын” кэмигэр хапсаҕайдаһыахха диэн ыҥырыы ыыппыт.
Уолаттар хапсаҕайдыылларын туһунан сонуну Куубак тэрийээччитэ Дьулустаан Захаров бигэргэттэ. Өттүк Леха “Саха Арена” хапсаҕайыгар хаһыс да сырыытын киирсэр — биир хотторуулаах, биир кыайыылаах. Оттон бу сырыыга кыайбыт уол сүүрбэ тыһыынчаны сиэбигэр уктуоҕа. Онон, Леоннаах Өттүк Леха күрэхтэһиини “туустаан-тумалаан” биэрэллэрин көрөөччүлэр, хапсаҕайы биһирээччилэр, күүтэбит.
«Азия Куубагын» туһунан сиһилии манна ааҕыҥ: https://edersaas.ru/aziya-kuubaga/
“Азия Куубагын” тэрийээччилэртэн биирдэстэрэ, спортивнай суруналыыс, комментатор Дьулустаан Захаров буолаары турар тэрээһинин туһунан санаатын үллэстэр:
— Атын омуктар Саха сирин алмааһынан уонна тымныынан эрэ биллэр диэн өйдөбүллээхтэр. Онон, хапсаҕайы киэҥ эйгэҕэ таһааран, атын норуоттар эмиэ билэллэрин, интэриэһиргииллэрин гына “Азия Куубагын” ыытабыт. Дьон-сэргэ төрүт көрүҥмүтүн – хапсаҕайбытын биллин, дьарыктанааччы, көрөөччү, биһирээччи элбээтин диэн сүрүн сыалы тутуһабыт. Үгүс дьон ону сыыһа өйдөөн, хапсаҕайбытын шоу оҥордулар дииллэр. Оннук буолбатах. Араас ньыманы туттан, кэпсэтиилэри ыытан, эдэр дьон болҕомтотун тарда сатыыбыт. Буолаары турар күрэхтэһиибитигэр “Саха Арена” анал каартатын атыыласпыт дьоҥҥо уонна киирии билиэтинэн Lada Vesta уонна Lada X-Ray диэн икки массыынаны, матасыыкылы, айфоннары, макбугу, харчынан бириистэри оонньотуохпут.
Айтана Аммосова, «Саха сирэ» хаһыат, edersaas.ru