ИДьМ Ленскэй оройуонунааҕы салаатын салайааччыта Александр Фесиков бэлиэтииринэн, оройуоҥҥа атыы-эргиэн кииннэригэр рейдэ үлэлэрэ салҕыы ыытыллаллар. Ааспыт нэдиэлэҕэ мааската суох сылдьыы иһин уопсайа 17 боротокуол оҥоһуллубут. Ол иһигэр биир киһи сымыйа QR куод оҥоһуллубутун туппуттар.
Маны таһынан коронавирус дьаҥа, ОРВИ улууска аһары элбээн Ленскэй куоратыгар бастакы уонна төрдүс нүөмэрдээх уонна Толоон нэһилиэгэр баар орто оскуолалар тэйиччиттэн үөрэххэ барыахтара. Маннык быһаарыыны бүгүн, тохсунньу 31 күнүгэр, оройуон аҕа баһылыга ылынна. Оскуолаларга оҕолор ыалдьыылара элбээн ОРВИ, коронавирус дьаҥар хаптарыы үксээн ааспыт нэдиэлэҕэ 130 киһи, оттон бу ааспыт өрөбүллэргэ 30 киһи эбии ыалдьыбыт. Ыалдьааччы улахан аҥаара оскуола оҕолоро. Суһал ыстаап мунньаҕар баһылык Жумарт Абильманов улуус бары оскуолаларын тэйиччиттэн ыыппакка, ханна ыалдьыы элбэх оскуолаларынан, уһуйааннарынан көрөн ыытар туһунан эттэ. Нэдиэлэ кэтээн көрүү кэнниттэн балаһыанньа тубустаҕына, оскуолалар үгэс быһыытынан үөрэниэхтэрэ.
Маны таһынан Ленскэй баахтабай бөһүөлэктэригэр ыалдьыы элбээбит. Онон ситимнээн бырамыысыланнай тэрилтэлэр салайааччыларыгар баахта кэмин уһатыы туһунан суруктар ыытыллыахтара. Ленскэй оройуонун сүрүн бырааһа кыттыылаах суһал ыстаап мунньаҕар маннык баахтабай бөһүөлэктэргэ Таалакааҥҥа уонна Чайыҥдаҕа мэдиссиинэ пууна тиийбэтин туһунан кыһалҕаны кэпсэттилэр. Бары ноҕурууска Ленскэй оройуонун киин балыыһатыгар сүктэриллэр эбит. Пандемия саҕаланыаҕыттан бу сытыы боппуруос. Баахтабай бөһүөлэктэргэ 14 тыһыынча кэриҥэ киһи үлэлиир. Суһал ыстаап хампаанньалар аадырыстарыгар лицензиялаах мэдиссиинэ пуунун аһыы туһунан уонна Ленскэй улуустааҕы киин балыыһатыттан бу ноҕуруусканы устар туһунан хаһыс да төгүллээх суругун ыытар.
Суһал ыстаап бары санитарнай ирдэбили тутуһан элбэх дьон тоҕуоруһар сиригэр маскалаах сылдьыыны ирдиир. Ону сэргэ, ыарыы киирэр сибикитэ билиннэ даҕаны дьиэҕэ бырааһы ыҥырарга сүбэлиир.
Ульяна ЗАХАРОВА, edersaas.ru