Ленскэйгэ 315 миэстэлээх оҕо саада үлэҕэ киллэрилиннэ

Ааптар: 
Бөлөххө киир:

Бүгүн, атырдьах ыйын 5 күнүгэр, Ленскэйгэ 315 миэстэлээх “Теремок” оҕо саадын  үөрүүлээхтик арыйдылар. Ленскэй олохтоохторун бу үөрүүлээх түгэнинэн Саха сирин баһылыга Айсен Николаев уонна миниистирдэр кэбиниэттэрин чилиэннэрэ эҕэрдэлээтилэр.

“Бүгүн Ленскэй  оҕолоро туппут кэрэ бэлэхтэрэ куорат уонна оройуон үөрэхтээһинэ саҥа таһымҥа тахсалларыгар кыаҕы биэриэҕэ. Өрөспүүбүлүкэҕэ маннык эбийиэктэр элбииллэригэр баҕарабын”, — диэтэ өрөспүүбүлүкэ баһылыга.
Аныгы таас дьиэҕэ муусука, спорт саалалара уонна бассейн бааллар. Бөлөхтөр оонньуур уонна оҕо миэбэлинэн толору хааччыллыбыттар.
Оскуола иннинээҕи тэрилтэни “Кинг-95” хампаанньа судаарыстыба уонна чааһынай бииргэ үлэлээһиннэригэр олоҕуран тутта. Манна “Теремок” оҕо саадын 184 иитиллээччитэ көһөн киириэҕэ уонна 2017 сыллааҕы төрүөх 130 оҕо ылыллыаҕа.
Санатан эттэххэ, Саха сирэ оҕо төрөөһүнүгэр үчүгэй көрдөрүүлэрдээх регионнартан биирдэстэринэн буолар. Оҕо төрөөһүнэ элбээтэҕинэ оҕо саадыгар наадыйыы улаатар. Оскуолаҕа киирэ илик оҕолор тэрилтэлэригэр миэстэ тиийбэт буолуута 2010 сылтан биллибитэ. Онон оҕо саадтарыгар саҥа миэстэлэри арыйыыга стратегическай быһаарыныы ылыныллыбыта: саҥа эбийиэктэри тутуу, бэлэм дьиэлэри атыылаһыы, судаарыстыба уонна чааһынай бииргэ үлэлээһинэ, бу салааны предпринимателлэр өйөөһүннэрэ.
Бу сыл бүтүөр диэри өрөспүүбүлүкэҕэ 26 оҕо саада  киириэҕэ. Оттон кэлэр үс сылга уопсайа 4722 миэстэлээх 35  оҕо саадын киллэрэр сорук турар, ол иһигэр үс саастарыгар диэри оҕолорго аналлаах 15 дьааһыла бөлөҕө.

СИА

+1
0
+1
0
+1
0
+1
0
+1
0
+1
0
+1
0