Россия биир бөдөҥ промышленнай хампаанньата саҥа үөрэх дьылын көрсө, Саха сиригэр аан бастакынан Ленскэй куоракка «Роснефть-кылааһа» диэн ааттаах анал кылааһы аста. Бу кылааска инникитин ньиэп-гаас промышленноһын идэтин талар санаалаах бастыҥтан бастыҥ оҕолор үөрэнэ киирдилэр.
«Роснефть»НХ» ПАУо олохтоох ыччаты үлэнэн хааччыйыыга улахан болҕомтотун уурар. Устудьуоннары практикаҕа, эдэр исписэлиистэри үлэҕэ ылар. Аны эрдэттэн оҕолору ньиэп-гаас салаатын үөрэҕэр сыһыарар сыаллаах. Ол курдук Ленскэй улууһун дьаһалтатын итиэннэ «Роснефть» алын сүһүөх хампаанньата – «Таас-Үрэх Нефтегазодобыча» ХЭУо-ны кытары өр сүбэлэһэн, дьүүллэһэн баран, быйылгы үөрэх дьылыгар Ленскэй куорат 1-гы нүөмэрдээх орто оскуолатыгар промышленнай хайысхалаах кылааһы арыйдылар.
Саҥа кылааска оҕолору сүүмэрдээһин номнуо, бу сааскыттан саҕаламмыта. Оҕолор үс түһүмэҕинэн куонкуруһу ааспыттара. Математикаҕа, физикаҕа уонна химияҕа эксээмэни туттарбыттарын таһынан, өссө тестированиены ааспыттара.
Онон олимпиада кыайыылаахтара, тургутууну этэҥҥэ ааспыт бастыҥтан бастыҥ кыргыттар уонна уолаттар үөрүүлээх быһыыга-майгыга балаҕан ыйын 1 күнүгэр «Алмаз» стадиоҥҥа оскуола уопсай линейкатыгар «Роснефть-кылааһыгар» киирдилэр.
«Таас-Үрэх Нефтегазодобыча» ХЭУо Саха сиринээҕи бэрэстэбиитэлистибэтин салайааччыта Евгений Хампиев биһиги өрөспүүбүлүкэбитигэр «Роснефть-кылааһа» ылбычча арыллыбатаҕын туһунан этэн туран:
- «Роснефть» Саха сиригэр ньиэп-гаас промышленноһын сайыннарыыга баараҕай былааннардааҕынан, кадрдарга наадыйыы улаатан иһэр. Олохтоох дьону промышленноска сыһыарар туһуттан, идэтийбит исписэлиистэри иитэн-үөрэтэн таһаарыаҕа. Онон, саҥа аһыллыбыт хампаанньа саҥа промышленнай хайысхалаах кылааска улахан эрэллээх, – диэн эбэн биэрдэ.
Бу күн «Таас-Үрэх Нефтегазодобыча» персоналга уонна социальнай бырагыраамаҕа управлениетын исписэлиистэрэ аһаҕас уруок ыыттылар. Саҥа кылааһы хампаанньа туох баар үөрэх оборудованиетынан, ону таһынан персональнай компьютерынан хааччыйбыт. Үөрэх былаана киэҥ. Аҥардас оскуола иһинээҕи бырагырааманан муҥурдаммакка, хампаанньа эбийиэктэригэр эмиэ сылдьыахтара. Оҕолор үлэ хаамыытын илэ харахтарынан көрүөхтэрэ-истиэхтэрэ. Ол чэрчитинэн бу күннэргэ оҕолор Красноярскайга Дивногорскай куоракка барыахтаахтар. Онно кыраайга баар «Роснефть» кылаастарын бары үөрэнээччилэрин кытары көрсөн, хампаанньа үлэтин уонна талбыт идэлэрин туһунан билсиэхтэрэ.
Эбэн эттэххэ… Бүгүҥҥү туругунан Россия 50 куоратыгар уонна бөһүөлэгэр «Роснефть» 105 анал кылааһа үлэлиир. Ол кылаастарга уопсайа 2500 оҕо үөрэнэр.
Анивера АКИМОВА