Ленскэйгэ оройуон баһылыгын быыбарыгар урбаанньыт Абильманов кыайда
Эрдэ суруйбуппут курдук, сэтинньи 26 күнүгэр ыытыллар Ленскэй оройуонун баһылыгын быыбарыгар уон киһи хандьыдаатынан туруоруллубутуттан сэттэтэ регистрацияламмыта, онтон биирдэстэрэ куолаһын кэлин устуммута.
Инньэ гынан, хандьыдааттар алтыа буолан киирсибиттэрэ. Ырытааччылар кинилэртэн үс хандьыдааты ордук чорбоппуттара: “Биир ньыгыл Арассыыйа” баартыйаттан турбут оройуон баһылыгын э.т., хомсомуол саҕаттан үлэлээбит, дьоҥҥо-сэргэҕэ биллэр Василий Лукьянцевы, бэйэтэ туруоруммут, Ленскэй куорат баһылыга Александр Хоруновы уонна эмиэ бэйэтэ туруоруммут, «Арман» ХЭУо генеральнай дириэктэрэ Жумарт Абильмановы.
Быыбар бэҕэһээ буолла. Барыта 13 тыһыынча киһи кэлэн куоластаата. Барыллаан ааҕыы түмүгүнэн, быыбардааччылар 46,7 % куоластарын ылан, Жумарт Абильманов хоппут. Василий Лукьянцев 26,1 % куолаһы ылбыт. Санатан эттэххэ, Василий Иванович алтынньы 8 күнүгэр ыытыллыбыт “Биир ньыгыл Арассыыйа” баартыйа праймериһыгар кыайан турар. Онтон Александр Хорунов 20,2 % куолаһы ылбыт. Быыбардааччылар 3,7 %-нара “барыларын утарабын” диэбит, атын үс хандьыыдаакка итинтэн аҕыйах киһи куоластаабыт.
Жумарт Абильманов News.Ykt.Ru сайт кэрэспэндьиэнин ыйытыытыгар кыайарга эрэллээх этим, миигин куорат уонна оробуочай бөһүөлэктэр олохтоохторо өйөөтүлэр. Ньиэптэн-гаастан киирэр бүддьүөттээх олорон, куһаҕаннык олорор сатаммат, бастатан туран, доруобуйа харыстабылын тупсарыыга, каадыры олохсуутуга, оҥорон таһаарар үлэни-хамнаһы сайыннарыыга итиэннэ бөдөҥ тэрилтэлэри кытары дуогабардаһан, олохтоохтору үлэнэн хааччыйарга үлэлиэхпит диэбит.
— Мин дьиҥинэн Лукьянцевка куоластаабытым эрээри, Абильманов хоппутугар соһуйбатым, — диир улуус олохтооҕо Галина Мыреева. — Жумарт Абильманов Ленскэйгэ эдэр эрдэҕиттэн, 1986 сылтан, олорор, кэргэннээх, икки уоллаах. Суолу тутар-өрөмүөннүүр тэрилтэни салайан үлэлэтэр. Биһиги суолбут-ииспит мөлтөҕө бэрт буолан, биир үксүн дьон кинини таллылар. Саҥа баһылык туһунан билигин тугу эмит этэр эрдэ, хайдах үлэлиирин, оройуону төһө сайыннарыаҕын, быыбардааччыларын эрэлин хайдах толоруоҕун олох көрдөрөн иһиэ турдаҕа.
Раиса Сибирякова, “Саха сирэ” хаһыат, edersaas.ru