Хомойуох иһин, эмиэ оҕо өлүүлээх суол быһылаана бүгүн, бэс ыйын 6 күнүн сарсыардатыгар, Ленскэй оройуонугар таҕыста.
Ол курдук, сарсыарда 06.00 чаас саҕана Ленскэй полициятын дьуһуурунай чааһыгар иһитиннэрии киирбит. Ленскэй куораттан 4 км ыраах сиргэ, суол кытыытыгар «иномарка» түҥнэстэн сытарын туһунан.
Барыллаан быһаарыынан, бу «Сузуки Эскудо» массыынаны сокуоннай сааһын ситэ илик уол ыытан иһэн, уруулун сатаан салайбакка, суол уҥа өттүгэр туораан түҥнэстибит.
Массыынаҕа олорсон испит 14-15 саастаах уолаттартан биирдэстэрэ тута миэстэтигэр тыына быстыбыт, оттон икки уол араас эчэйиини ылан, балыыһаҕа киллэриллибиттэр.
Быһылаан буолбут сиригэр билигин суһал-силиэстийэлиир бөлөх үлэлиир.
Бу туһунан СӨ ИДьМ-тын ГИБДД пропагандаҕа отдела иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: СӨ ИДьМ-тын ГИБДД пропагандаҕа отдела
+1
+1
+1
+1
+1
+1
+1