Уопсастыба

Ленскэйгэ кубаны туттулар

Ленскэй оройуонугар Мухтуйа үрэххэ соҕотох сылдьар кубаны туттулар. Бу сэдэх көтөр күүһэ эстэн, үөрүттэн хаалбыт. Үрэх мууһа уулла илик буолан, куба өр барыа суохтаах этэ.


 

Оройуоннааҕы айылҕа харыстабылын кэмитиэтин үлэһиттэрэ кубаны тутан ылан баран, бэтэринээрдэргэ илдьэн көрдөрбүттэр. Кубаны сарайга аҕалан укпуттар, аһаппыттар. Бэтэринээрдэр көтөрү чинчийэн көрөн баран, доруобай, ыарыыта суох, эдэр буолан, аччыктаан, күүһэ эстибит диэн быһаарбыттар. Арай, кынатыгар кыра баастаах эбит.

Көтөр дьонтон куттаммат, куота да, боотургуу да сатаабат. Тугу биэрэллэрин барытын аһыыр. Исписэлиистэр этэллэринэн, бу 2 саастаах куба.

Кубаны Мииринэйдээҕи зоопаркаҕа биэрээри гыналлар. Ол эрээри, интэриниэт ситимигэр дьон ону утарар, көҥүлгэ ыытыҥ диэн туруорсар.

 

Ыспыраапка

Араҕас тумустаах куба (лебедь-кликун) – САССР Кыһыл кинигэтигэр киирбит көтөр, бултуур бобуллар. Финляндияҕа национальнай символ быһыытынан биллэр.

Куба бу көрүҥэ Бүлүү умнаһыттан Өлүөнэ өрүс хотугу өттүгэр, Өлөөҥҥө уонна Халыма, Индигир өрүстэринэн тарҕаммыт.

Быйыл дьыл эрдэлээн, көтөрдөр эмиэ эрдэ кэлбиттэр. Дьиҥинэн, кубалар ыам ыйын саҥатыгар, ортотугар көтөн кэлээччилэр. Ыам ыйын бүтүүтэ сымыыттыыр, от ыйыгар оҕолоро тахсаллар. Балаҕан ыйыгар оҕолорун көтүтэлиир. Алтынньы саҥатыгар соҕуруу көтөллөр. Кубалар сүрүннээн уу үүнээйитинэн, үөнүнэн-көйүүрүнэн аһылыктаналлар. Үйэлэрин тухары биир эрэ ханыыланаллар. Доҕордоро өллөҕүнэ, хас да сыл кинини кэриэстээн, соҕотох сылдьаллар. Үс сааһын туоллаҕына эрэ, муус-маҥан өҥнөнөр. “Шипун” диэн кубаттан уратыта – араҕас тумустаах уонна моонньун «S» буукуба курдук токуруппат, ыйааһына да кыра. Наһаа улаханнык хаһыытыыр, ол да иһин “кликун” диэн ааттаннаҕа.

Ангелина ВАСИЛЬЕВА, “Саха сирэ” хаһыат, edersaas.ru

1
0
Telegram Whatsapp

Добавить комментарий