Ленскэйгэ коронавируһунан ыалдьыы ахсаана элбии турар

Бөлөххө киир:

Ленскэй оройуонугар коронавирус дьаҥыгар хаптарааччы ахсаана элбии турар. Хааччахтааһын миэрэлэрэ тутуһуллубат, харыстанар маасканы кэппэт буолуу — бу барыта дьаҥ  элбиирин кытары быһаччы сибээстээх. Бу күннэргэ  полиция үлэһиттэрэ рейдэ ыытаннар, мааската суох сылдьар дьоҥҥо боротокуол толордулар.

Билигин оройуон киинин балыыһатыгар 61 киһи эмтэнэр, реанимацияҕа 9 киһи сытар, 10 киһи интенсивнэй терапияҕа эмтэнэр. Нэдиэлэ устата  5 киһи өлбүт. Улахан аҥаардара вакцина ылбатах дьон ыалдьыбыттарын суһал ыстаапка иһитиннэрбиттэр. Ону таһынан 16 киһи ааспыт  ыйга бу дьаҥтан өлбүт. Оскуолаҕа киирэ илик саастаах оҕолор  ыалдьан балыыһаҕа киирэллэр эбит, сорох оҕолор анаалыстарын бэрэбиэркэҕэ Дьокуускайга ыыппыттар. Оҕо балыыһатыгар куойка тиийбэккэ кэҥэтии барбыт. Ленскэй оройуонун баһылыга Жумарт Абильманов бэлиэтииринэн, быһыыны биэрии тэтимэ олус намтаабыт.  «Быһыы ыларга ыксаабат дьон иннигэр эппиэтинэһи сүгэр кыахпыт суох, өлбүт, улаханнык ыалдьыбыт дьон бары вакцина ылбатах дьон буолаллар. Ол аата вакцина дьайыыта туһалаах эбит, көмүскүүр диэн этиэххэ наада, хайаан да вакцина ылыахха наада», — диэн эбэн эттэ.
Билигин Ленскэй оройуонугар Совигрипп диэн оҕолорго гирииби утары вакцина кэлбит. Эпидемиологтар оҕолор төрөппүттэрэ вакцинаттан аккаастамматтарыгар сүбэлииллэр. Маассабай вакцинация дьаҥы кыайар кыахтаах. Ол иһин полиция үлэһиттэрэ рейдэҕэ тахсан атыы-эргиэн кииннэрин  бэрэбиэркэлииллэр. Ордук элбэх дьон мустар сирин көрөллөр. Мааската суох сылдьыбыт дьону ыстарааптыыр туһунан суһал ыстаап дьаһала тахсыбыт.

Ульяна ЗАХАРОВА, edersaas.ru

+1
0
+1
0
+1
0
+1
0
+1
0
+1
0
+1
0