Айсен Николаев атырдьах ыйын 5 күнүгэр Ленскэй оройуонугар кэллэ. Саха сирин Ил Дарханын оробуочай сырыыта биисинэс-инкубаторы үөрүүлээхтик арыйыы сиэригэр-туомугар кыттыыттан саҕаланна.
Өрөспүүбүлүкэ баһылыга бу дьиэ тутуута 2013 сылтан саҕаламмытын, тохтуу да сылдьыбыт түгэнин аҕынна. Ол эрээри өрөспүүбүлүкэ предпринимательствоҕа, эргиэҥҥэ уонна туризмҥа министиэристибэтин уонна оройуон дьаһалтатын көмөлөрүнэн хамсааһын тахсан, Саха сиригэр бу 17-с биисинэс-инкубатор аһылынна.
“Дьоҕус биисинэһи сайыннарыы – Ленскэй куоратын курдук бөдөҥ нэһилиэнньэлээх пууннарга бу сүрүн соруктартан биирдэстэрэ. Дьоҕус биисинэһи маннык өйөөтөххө, дьоҕус предпринимательство атаҕар туруоҕа, саҥа үлэ миэстэлэрэ тэриллиэхтэрэ, нолуок киириэҕэ, нэһилиэнньэҕэ туһалаах өҥөлөр оҥоһуллуохтара”, — диэтэ кини. Ил Дархан Ленскэй оройуона нэһилиэнньэҕэ өҥө оҥорор улуустартан биирдэстэрэ диэн бэлиэтээтэ. Маны үчүгэй хардыы быһыытынан сыаналаан, биисинэс-инкубатор аһыллыыта дьоҕус биисинэскэ тирэх буолуо диэн эрэннэ.
Ленскэй оройуонун баһылыга Жумарт Абильманов этэринэн, бүгүн оройуоҥҥа 220 дьоҕус тэрилтэ үлэлиир, 1600 кэриҥэ биирдэм предприниматель баар.
1100 кв. м. иэннээх икки этээстээх аныгы дьиэҕэ сыл бүтүөр диэри сүүрбэ резидент көһөн киириэҕэ. Бу тэрилтэлэргэ чэпчэки аренда төлөбүрэ олохтонуо, анал кэбиниэттэр бэриллиэхтэрэ, саҥа саҕалыыр предпринимателлэргэ субсидия уонна дьоҕус кирэдьиит көрүллүөхтэрэ. Предпринимателлэр юрист өҥөтүнэн туһаныахтара.
Санаттахха, Уһук Илиҥҥэ бастакы биисинэс-инкубатор Дьокуускайга 2006 сыллаахха аһыллыбыта. Бүгүн маннык эбийиэктэр өрөспүүбүлүкэ 17 нэһилиэнньэлээх пуунугар үлэлииллэр. Бу тэрилтэлэр саҥа саҕалыыр предпринимателлэргэ бары ыарахаттары тулуйалларыгар уонна ырыынак усулуобуйатыгар туруулаһалларыгар көмөлөһөллөр.
2018 сылга биисинэс-инкубатордар өҥөлөрүнэн 27 тыһыынча киһи туһаммыта. Предпринимателлэр бу ыйыллыбыт кэмҥэ 484 үлэ миэстэтин таһаардылар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата