Ленскэй олохтоохторо бурдук ас арааһа элбэҕиттэн, сибиэһэйиттэн, минньигэһиттэн үөрэллэр.
Урукку үүт собуотун дьиэтигэр үлэлии турар оройуон бэкээринэтэ өссө түөрт суол бурдук ас арааһын эбэн биэрдэ. Бу курдук тэрилтэ сөп-сөп үлэтин сайыннаран, кэҥэтэн иһэр. Бу сырыыга араас халаачыктар, иэдьэгэйдээх бэрэскилэр эбилиннилэр. Өссө нэдиэлэ бүтүүтэ сип-сибиэһэй кекс атыыга тахсар диэн Ленскэй оройуонун дьаһалтатын пресс-сулууспата иһитиннэрэр.
Бэкээринэҕэ үлэ сарсыарда биэстэн саҕаланар. Түмсүүлээх, иллээх кэлэктиип биир хонук устатыгар 800 кг бурдуктан ас арааһын астыыр. Сарсыарда 500 булочка, 200 сочник (иэдьэгэйдээх бэрэски), 170 халаачык бэлэм буолар. Оттон киэһээтин оһоххо 300 ботуон, 800 килиэп угуллар. Бэкээринэҕэ үлэ эбиллэн, ас-үөл арааһа дэлэйэн иһэр.
—Бу нэдиэлэттэн биһиги халаачык уонна сочник, ол эбэтэр иэдьэгэйдээх бэрэски арааһын астыыр буоллубут. Нэдиэлэ бүтүүтүгэр кекс астыахпыт, онно аналлаах буһарар халыыптарбыт кэлиэхтээхтэр. Биһиги урукку ньыманан астыыбыт, ону «эбэлэрбит ырысыаптара» диэн ааттыыбыт. Аспытын-үөлбүтүн дьон хамаҕатык атыылаһар, — диир бэкээринэ технолога Надежда Свинтиха.
Дьон-сэргэ атыыга саҥа тахсыбыт аһы-үөлү үөрэ-көтө атыылаһаллар. Булочкаларын букатын да сөбүлүүллэр. Саахардааҕа, повидлолааҕа, корицалааҕа, үрдүгэр минньигэс кутуллубута, изюмнааҕа букатын кэрэхсэнэр.
—Мин бэйэбит бэкээринэбит астыыр аһын уруккуттан үөрүүнэн атыылаһабын. Аны халаачыктарын амсайыам. Астара барыта наһаа минньигэс уонна сибиэһэй. Өссө сыаналара уруккунан турара үөрдэр», — диэн бэлиэтиир атыылаһааччы Татьяна Федорова.
Санатан эттэххэ, оройуон баһылыга быйыл саас сыл бүтүөр диэри олохтоох тэрилтэлэр аска-үөлгэ сыананы үрдэппэттэригэр дьаһал биэрэн турар диэн пресс-сулууспа бэлиэтиир. Бу бурдуктан, эттэн, үүттэн аска-үөлгэ буолара этиллэр.
Ленскэй оройуонун дьаһалтатын пресс-сулууспата
+1
+1
+1
+1
+1
+1
+1