Ленскэйгэ бэйдиэ сылдьар ыттары дьаһайыыга сокуону кэһии баарын борокуротуура булла.
Дьон-сэргэ бэйдиэ сылдьар ыттартан эмсэҕэлээбэтин туһугар Ленскэй куорат дьаһалтата туох үлэ ыыппытын бэрэбиэркэлээтилэр. Онно биллибитинэн, Ленскэй куорат дьаһалтата туох даҕаны миэрэ ылбатаҕын түмүгэр бэйдиэ сылдьар ыт ахсаана аһары элбээбит.
edersaas.ru
Дьаһалта бэйдиэ сылдьар ыттары туттарар сыалтан чааһынай тэрилтэни кытта 1 мөлүйүөн 216 тыһыынча суумалаах хантараак түһэрсибит уонна үлэ түмүгүн хонтуруоллаабатаҕын түмүгэр, 868 тыһыынча солкуобай туһааннаммыт дьыалаҕа туттуллубатах.
Нэһилиэнньэлээх пууҥҥа бэйдиэ cылдьар ыттары олохтуур анал питомник тутуллубатах. Оттон тутуу бу сыл атырдьах ыйыгар туттарыллыахтаах эбит. Арай быстах кэмҥэ ыттары тутар сир бааһынай хаһаайыстыба сиригэр-уотугар оҥоһуллубут даҕаны, баара суоҕа 12 эрэ вольердааҕа билиннэ. Маныаха, вольердар кыһыны туоруурга бэлэмэ суохтара, оҥоһуллубут сиэккэлэр алдьаныылаах буоланнар, ыт таах куотар кыахтааҕын көрдөрбүттэр.
Маны таһынан, бэтэринээринэй сулууспа ыттар ыарыылаахтарын дуу суоҕун дуу бэрэбиэркэлиир анал үлэни ыыпатах. Бу оҥоһуллубатах үлэлэр уонна бэйдиэ сылдьар ыттар оҕоҕо саба түһэн эчэтиилэрин түмүгүнэн, силиэстийэлиир уорган Арассыыйа Федерациятын холуобунай кодексатын 293 ыстатыйа 2-с чааһынан борокуротуура хонтуруолугар холуобунай дьыала ууруллан сытар.
Бэлиэтээн этэр буоллахха, тохсунньу 20 күнүгэр аҕыс саастаах оҕоҕо ыттар саба түспүттэрэ.
Ульяна ЗАХАРОВА, edersaas.ru