Ленскэйгэ хаарбах дьиэттэн дьону көһөрүү бырагырааматынан 10 мэндиэмэннээх дьиэ тутулунна.
Бүгүн, сэтинньи 10 күнүгэр, саҥа дьиэ күлүүһүн үөрүүлээх быһыыга-майгыга 12 ыалга туттардылар. Кинилэр эргэ дьиэлэриттэн саҥаҕа көһүөхтэрэ.
Ленскэй оройуона саамай элбэх хаарбах дьиэлээх оройуоннарга киирсэр. Бу туһунан Ил Дархан Айсен Николаев иһитиннэрэн турар. СӨ Тутууга министиэристибэтигэр чопчулаабыттарынан, бу 2016 сыл тохсунньу 1 күнүгэр диэри хаарбах туруктааҕынан билиниллибит дьиэлэр.
Якутская уулуссаҕа үлэҕэ киирбит элбэх кыбартыыралаах дьиэҕэ, бүгүн күлүүһү илиилэригэр туппуттары киллэрэн туран, сыл бүтүөр диэри 33 хаарбах дьиэттэн 64 ыал көһүөхтээх. Дьиэ уопсай иэнэ 6 тыһ. кв.м. Манна 16 биирдии хостоох, 25 иккилии хостоох уонна 23 үстүү хостоох кыбартыыралар бааллар.
Дьиэни «777» аахсыйалаах уопсастыба туппут. Бу хаарбахтан саҥаҕа көһөрүү бырагырааматынан, хампаанньа алтыс дьиэтэ. Сыл түмүктэниэр диэри хампаанньа бу уулуссаҕа өссө биир дьиэни киллэриэхтээх. Манна 64 дьиэ кэргэн көһүөҕэ.
«Дьиэ хаачыстыбалаах, аныгы, тупсаҕай быһыылаах. Тоҕус мэндиэмэҥҥэ кыбартыыралардаах. Тутааччы үлэлээбитэ ыраатта. Кинилэр туппут дьиэлэригэр олорооччулар бары сөбүлүүллэр«, — диэн куорат дьаһалтатын хаарбахтан саҥаҕа көһөрүүгэ салаа начаалынньыга Алексей Урядников этэр.
«Олорор дьиэ уонна куорат эйгэтэ» национальнай бырайыагынан, бырагыраама иккис түһүмэҕэр өрөспүүбүлүкэҕэ 2024 сылга диэри хаарбахтан саҥаҕа — 1 мөл. 151 тыһ. кв. м. иэннээх сиргэ дьону көһөрүү былааннанар. Федеральнай бүддьүөттэн бу сыалга 24 млрд солк. көрүллүө. Өрөспүүбүлүкэ бүддьүөтүттэн хос үбүлээһин 1% тэҥнэһиэ.
Оройуон дьаһалтатын пресс-сулууспатын уонна Тутуу министиэристибэтин хаартыскалара
+1
+1
+1
+1
+1
+1
+1