Ленскэйгэ бүддьүөт үлэһиттэрэ кыбартыыраҕа тигистилэр

Бөлөххө киир:

Ленскэй оройуонун дьаһалтата бүддьүөт эйгэтин үлэһиттэригэр үлэлииллэрин тухары кыбартыыранан хааччыйар үлэтин салҕыыр.

Ол курдук, сыл саҕаланыаҕыттан уопсайа 16 киһи үлэтинэн кыбартыыраҕа тигистэ. Балар истэригэр учууталлар, уһуйаан иитээччилэрэ, эбии үөрэхтээһин учууталлара уонна муниципальнай тэрилтэ үлэһиттэрэ бааллар. Оройуон дьаһалтата бу ааспыт нэдилэҕэ эбии биэс кыбартыыраны атыылаһан үлэһиттэри олохтоото. Манна английскай тыл, математика, уруһуй учууталлара уонна уһуйаан иитээччитэ, муниципальнай тэрилтэ исписэлииһэ көһүөхтэрэ.

2021 сыл саҕаланыаҕыттан уопсайа 16 кыбартыыра түҥэтилиннэ. Аҥаарын улуус бэйэтэ атыыласпыт, аҥаарын урукку үлэһиттэр босхолообуттар. Баайы-дуолу кытта сыһыаннаһыы кэмитиэтэ эбии икки дьиэни атыылаһар туһунан былаанныыр. Бэлиэтээн эттэххэ, Ленскэй оройуонун дьаһалтата 2010 сылтан үлэһиттэргэ анаан кыбартыыралары атыылаһар. Ол эрээри учууталлар, быраастар, тириэнньэрдэр бары бииргэ «уопсай» дьиэ курдук олороллоро. Ол курдук, биир кыбартыыраҕа үстүү үлэһит буолан кыттыһан олорор усулуобуйаҕа дьиэ кэргэни тэрийии уустуктардааҕын оройуон баһылыга Жумарт Абильманов баһылык буолаат өйдөөн, “уопсай” дьиэ диэн өйдөбүлтэн тахсан хас биирдии үлэһиккэ биирдии кыбартыыраны диэн быһаарбыт. Бүгүҥҥү күҥҥэ оройуон балаансатыгар 90 кыбартыыра баар, манна бүддьүөт үлэһиттэрэ дьиэ кэргэттэрин кытта олороллор.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0