Алтынньыга Ленскэй оройуонугар сокуоннай саастарын туола илик оҕолорго социальнай-реабилитационнай киин саҥа дьиэтэ аанын тэлэччи арыйда.
Урукку мас дьиэлэрэ эргэрэн, 2011 сыллаахха суут киини сабар туһунан быһаарыы таһаарбыта. Ол эрээри, кириисис буолан, саҥа дьиэни тутуу өр сылларга тохтоон хаалбыта. Онон атын суоллары көрдөөбүттэрэ. Киин аптека куорат киинигэр 2 этээстээх таас дьиэтин туран биэрбитэ. Фармацевтарга оройуон салалтата атын дьиэни атыыласпыта.
Ленскэй оройуонун салалтата кииҥҥэ анаммыт дьиэни “Монолит” тэрилтэҕэ өрөмүөннэтэн, ититиитин, уотун, вентиляциятын, уу ситимин саҥаттан тартаран, олбуорун оҥорторбута. Үрдүк күүрүүлээх электролинияны атын сиринэн ыыппыттара, ирдэбил быһыытынан, видеонан кэтээн көрүүнү туруорбуттара. Манна СӨ үлэҕэ, социальнай сайдыыга министиэристибэтэ көмөлөспүтэ.
Оройуон баһылыгын, дьокутааттарын көмөлөрүнэн, саҥа миэбэл, тэрил ылар кыахтаммыттара.
Бу кииҥҥэ сыллата 100-тэн тахса ыаллар, 150-тэн тахса оҕолор психологическай, быраап өҥөлөрүн, материальнай көмөнү, сүбэни-аманы ылаллар. Кэлэктиип ыарахан балаһыанньаҕа түбэспит дьиэ кэргэттэпгэ көмөлөһөргө өрүү бэлэм.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн.