Бу күннэргэ Ленскэй улууһун ыччата Саха АССР 100 сылыгар анаммыт «Сүүс сыллааҕы сайдыы былаана» диэн өрөспүүбүлүкэтээҕи бырайыакка кыттыыны ылла.
Тэрээһини өрөспүүбүлүкэҕэ биллэр, аныгы технология бары көрүҥнэрин дэгиттэрдик баһылаабыт араас эйгэ эдэр исписэлиистэрэ көҕүлээн, тэрийэн ыыттылар. Кинилэр Былатыан Ойуунускай 1927 сыллаахха суруйбут «Улуу сүүс сыллаах былаан» диэн трактатыгар Саха сирэ сайдыытын уонунан сылларынан арааран аттарбыт былаанын салгыыр соруктаахтар.
Ил Дархан Айсен Николаев ыччаттар көҕүлээһиннэрин өйөөбүтэ. Икки күн устата олоххо актыыбынай көрүүлээх ыччат, уопсастыбанньыктар, Ленскэй улууһун нэһилиэктэрин бэрэстэбиитэллэрэ оройуон 100 сыллаах сайдыытын ырыттылар. Сиэссийэ кыттыылаахтара Ленскэй оройуонугар туризм, тыа хаһаайыстыбата, үөрэхтээһин эйгэтин тирэх киининэн буолуон сөп диэн бэлиэтээтилэр. «Бу тэрээһиҥҥэ ырытыллыбыт боппуруостары мунньан, үөрэтэн баран, «Якутия 2122» саҥа оҥоһуллан эрэр саайтка ыытыахпыт. Бу саайт сонуна өрүү саҥардыллан иһиэҕэ», — диэн тэрийээччилэр түмүк оҥордулар. Бу сонун сүүрээн олоххо киириитин буолан ааспыт сиэссийэ кыттыылаахтарын сиэннэрэ уонна хос сиэннэрэ көрүөхтэрэ турдаҕа. Былатыан Ойуунускай 100 сыл анараа өттүгэр өтө көрүүтэ барыта туолла. Ол курдук, ааспыт үйэ 20-с сылын саҥатыгар кини дьон тута сылдьан төлөпүөнүнэн кэпсэтиэхтэрэ, пуойастар, массыыналар муҥутуурдук сайдыахтара, сөмүлүөттэр, аракыаталар көтүөхтэрэ, эр киһи уонна дьахтар тэҥ бырааптаах буолуохтара диэн эппитэ туолла. «Саха сирин 100 сыллааҕы сайдыыта» бырайыак 2021 сыл ыам ыйын 27 күнүттэн саҕаламмыта.
Бу тосхол чэрчитинэн улуустарга олоххо көхтөөх дьону мунньан, оройуоннар сайдыыларыгар туһуламмыт өр сыллааҕы былааннары тобулаллар. Ыытыллыбыт үлэ чэрчитинэн өрөспүүбүлүкэ 100 сылын бэлиэтээһинигэр 2022 сылга анал докумуон оҥоһуллуоҕа.
Елена ПОТОЦКАЯ, «Саха сирэ» хаһыат, edersaas.ru