Ааспыт сайыҥҥыттан Ленскэй оройуонугар олохтоох бородууксуйаны оҥорон эрэллэр. Оройуон бүддьүөттүттэн эргэ үүт сыаҕын дьиэтин өрөмүөннээбиттэрэ. Аныгылыы тэрили атыыласпыттара. Маҥнай муниципальнай бэкээринэ арыллыбыта. Бу соторутааҕыта эт сыаҕын бастакы баартыйа бэлимиэннэрин маҕаһыыннарга тарҕаттылар.
Бэҕэһээ, олунньу 9 күнүгэр, «Батамай” маҕаһыыҥҥа 50 кг бэлимиэни атыылата тиксэрдилэр. Саҥа бородууксуйа тута бар дьон болҕомтотун тарта. Бэлимиэннэри атын туох эбилигэ суох аҥардас эттэн, туустан уонна биэрэстэн эрэ оҥорор буоланнар, олохтоохтор хамаҕатык атыыласпыттар.
Биир чааска үлэһит 3-5 кг бэлимиэни оҥорон таһаарар эбит. Билиҥҥи туругунан эт сыаҕар бу эрэ бородууксуйаны оҥороллор. Сотору кэминэн эттэн уонча көрүҥ түргэнник буһарыллар бородууксуйаны оҥоруохтара. Кэтилиэт, тиэптэл, голубцы, шашлык арааһын оҥорон батарыахтара.
Ленскэйдэр бу сайын ыраас уу сыаҕын арыйары эмиэ былаанныыллар.
Ульяна ЗАХАРОВА.