Ленскэй ыалын арбууһа, винограда сылаас дойду саадыттан итэҕэһэ суох үүннэ

Оттон хоруона хамсыгын хардыыта, хааччахтааһына үлэһит ыалы харгыстаабата диэн, Ленскэй оройуонун дьаһалтатын пресс-сулууспата иһитиннэрэр.

Ярославскай нэһилиэгин олохтоохторо Серкиннэр дьиэ кэргэн тиэргэннэрэ саад курдук. Болҕомтону тардар кэрэ. Манна киһи сүргэтэ көтөҕүллэр. Бу үлэһит, иллээх дьиэ кэргэн винограды уонна арбууһу дэлэччи олордор. Сылааһы таптыыр үүнээйилэр амтанныын ураты минньигэстэр диэн бэлиэтииллэр.

Дмитрий Иванович уонна Лидия Владимировна манна, төрөөбүт-үөскээбит тапталлаах дойдуларыгар, саастарын тухары тыа хаһаайыстыбатынан дьарыктаммыттар. Икки кыыстаах ыал хаһаайыстыба тэринэн, оҕуруот олордон, ону көрөн, бүөбэйдээн дьоҥҥо-сэргэҕэ үтүө холобур буолаллар. Сыллата олордор хортуоппуйдарыттан, сүбүөкүлэлэриттэн, моркуоптарыттан, хаппыысталарыттан өссө туох эрэ уратыны олордуох баара диэн толкуйга түспүттэр.

— Биһиги урут сылаас дойдуга көспүт киһи диэн баҕарар этибит. Онтон бары манна олохтоох дьон буоллахпыт, дьиэбит таһын төһө баҕарар соҕуруу дойду курдук оҥоруохпутун сөп эбит диэн санааҕа кэлбиппит. Бастаан арбуһу аһаҕас халлаан анныгар олордон бараммыт, ол сайын 80 ылбыппыт, — диэн хаһаайын Дмитрий Серкин кэпсиир. Дьэ, ол кэнниттэн, санаалара көтөҕүллэн, бөҕөхсүйэн, Дмитрий Ивановичтаах, аны, винограды олордубуттар. Ол табыллан үөрүүлэрэ улахан.

Бу оҕуруот аһын олордуунан дьарыктанар ыалы урут нэһилиэктэрин дьоно үчүгэйдик билэр буоллахтарына, билигин кинилэри Саха сирин оҕуруотчуттара, даачалаах, үүнээйини сэҥээрэр, сэргиир дьон үксүлэрэ билэр буоллулар. Тоҕо диэтэххэ, кыыстара быйыл Инстаграмҥа страница арыйбыта. Оттон нэһилиэк Ленскэйтэн 80 килэмиэтир ыраах. Өссө суоллара кыһынын эрэ баар. Дьэ, онон дьону кытары куйаар ситиминэн сибээстэрэ кэҥээтэ. Дьон-сэргэ кинилэртэн виноград, арбуз ханнык суортарын талбыттарын, хайдах олордубуттарын, бүөбэйдиири токкоолоһор. Дьиэ кэргэн ситиһиититтэн үөрэллэр, үчүгэйи баҕараллар.

Дьиэ кэргэн сир үлэтигэр ылсыбыта 22 сыл буолбут. «Күүспүт, сэниэбит тиийэрин тухары үлэлиэхпит» дииллэр. Онуоха оҕуруокка хасыһан үлэлээһин, ханныгын да иһин, сүргэни көтөҕөрүн, дууһаны манньытарын бэлиэтииллэр. Кинилэр, кылаабынайа, киһи сөбүлүүр дьарыгар ылыстаҕына, илиитин араарбакка сыралаһар буоллаҕына, хотугу тымныы да кыһын эрэллээх доҕор буолуон уонна киһи тугу баҕарарын биэриэн сөбүн этэллэр диэн пресс-сулууспаттан иһитиннэрэллэр.