Ленскэй улууһун оччотооҕу баһылыга Сергей Высоких кыттыылаах, икки аҥаар сыллааҕыта тэриллибит улахан айдааннаах дьыалалартан биирдэстэригэр суут бириигэбэрэ таҕыста.
Вера МАКАРОВА, «Саха сирэ» хаһыат, https://edersaas.ru/
Бу туһунан СӨ Борокуратууратын пресс-сулууспата уонна РФ Силиэстийэлиир кэмитиэтин Саха сиринээҕи управлениета иһитиннэрдилэр. Ленскэй улууһун оччотооҕу баһылыга Сергей Высокихха холуобунай дьыала 2014 сыл сэтинньи ыйыгар тэриллибитэ. РФ Холуобунай кодексатын 159-с ыст. 4-с чааһынан, ол эбэтэр, сулууспа балаһыанньатынан туһанан, атын дьон ураты бөдөҥ кээмэйдээх үбүн-малын хорон сиэһиҥҥэ түөкүннээһин бэлиэтэ баарынан.
Силиэстийэ бара турар кэмигэр Высоких дуоһунаһыттан босхоломмута. Хааччахтыыр миэрэ быһыытынан, киниэхэ дьиэтээҕи хаайыы туттуллубута.
Суут быһаарбытынан, 2013 сыл ахсынньытыгар баһылык Высоких көҕүлээһининэн, чааһынай дьонтон (ол иһигэр, кини сокуоннай ойоҕуттан) оҕо саадыгар диэн, федеральнай бүддьүөттэн 56 мөл. солк. суумалаах дьиэ атыылаһыллыбыт. Ити харчыттан 28 мөл. солк. Высоких ойоҕун счетугар ыытыллыбыт.
Ити дьыала тэриллиэ түөрт сыл иннинэ, муниципальнай тэриллии ити дьиэни бастаан биир киһиэхэ атыылаабыт, онтон 1 мөл. солк. суумаҕа бэйэтэ билэр дьонун кытта атыыласпыт.
Ону ааһан, бу дьиэ бары өттүнэн хайдах даҕаны оҕо саада буолар кыаҕа суоҕа силиэстийэ кэмигэр биллибит. Үлэһиттэрэ киниэхэ ону этэ-быһаара сатаабыттарын, Высоких аанньа ахтыбатах.
Ленскэй оройуоннааҕы суутун уурааҕынан, сууттанааччы Сергей Высоких буруйдааҕынан билиниллэн, 3 сылга уопсай режимнээх холуонньаҕа көҥүлэ быһыллыбыт, манна эбии 300 тыһ. солк. суумалаах ыстараап төлүөхтээх.
Суут саалатыттан наручник кэтэрдэн тутан барбыттар. Бириигэбэр сокуоннай күүһүгэр киирэ илик, өрүттэр ааһыныахтарын сөп.
Вера МАКАРОВА, «Саха сирэ» хаһыат, https://edersaas.ru/
Хаартыска: интернет.