Ленскэй үтүө санаалаах волонтердара

Баҕа өттүлэринэн дьоҥҥо-сэргэҕэ көмөлөһөр волонтердар үлэлэрэ өссө элбээтэ. 2021 сыл кэнники ыйдара арыый холкутук ааспыт, дьон-сэргэ көмөҕө наадыйыыта кыччаабыт эбит буоллаҕына, билигин көмөлөһөөччүлэр ахсааннарын элбэтэр наада буолла. Куорпус резервэтигэр билиҥҥитэ Ленскэй оройуонугар олорор, үлэлиир, дьоҥҥо-сэргэҕэ, кыһалҕалаахтарга көмөлөһүөн баҕалаах 29 киһи баар.

Ленскэй оройуонун дьаһалтатын ыччакка уонна дьиэ кэргэн бэлиитикэтигэр кэмитиэтин салайар Александра Сидорова кэпсээбитинэн, волонтердар уонна массыыналаах волонтердар ирдэнэллэр. Оскуола оҕолорун манна кытыннарар табыллыбат.

«65 үөһээ саастаах соҕотоҕун олорор кырдьаҕастарга, инбэлииттэргэ, уруута-аймаҕа суох дьоҥҥо көмөлөһөбүт. Кинилэр 4-10-29 төлөпүөҥҥэ эрийэн сайаапкаланаллар. Волонтер испииһэги уона харчыны ылан саамай наадалаах табаардарын, эмтэрин атыылаһан олорор сирдэригэр тиэрдэн биэрэр. Биһиги дьоҥҥо баҕа өртүлэринэн босхо, туох да төлөбүрэ суох көмөлөһөргө бэлэм 18 үөһээ саастаах ыччаты ыҥырабыт», — диэн этэр.

Волонтердар куорпустарыгар үлэлэһэр 29 киһиттэн тоҕуһа ыччат уонна дьиэ кэргэн бэлиитикэтин кэмитиэтин үлэһиттэрэ. Баҕа өртүлэринэн көмөлөһөөччүлэр педагогтар, медиктэр, тэрилтэ үлэһиттэрэ. Кинилэр үлэлэриттэн быыс булан көмөлөһөргө тиэтэйэллэр. Ол гынан баран, сороҕор, волонтердар толоруо суохтаах үлэлэрин ирдиир дьон баар буолаллар. Холобур, үлэспит астарын волонтердарга босхо аҕалтара сатыыллар.

«Миэхэ оҕурсу наада. Ол гынан баран, кылааккай, ньылаархай оҕурсуну аҕалбатынар. Бөлтөрхөйдөрдөөх оҕурсуну талан, икки чааһынан дьиэбэр аҕалаллынар» диэн төлөпүөннүүр дьон баар буолааччылар. Эбэтэр биэнсийэҕэ олорор дьон оҕолоро төлөпүөннээннэр кинилэр ийэлэрэ, аҕалара соҕотоҕун олорорунан, дьонноругар волонтердар аһын-үөлүн таһар эбээһинэстээхтэрин дакаастыы, туруорса сатааччылар эмиэ көстүтэлээччилэр. Итиннэ мин этэбин, бу бастатан туран, оҕолоро төрөппүттэригэр бэйэлэрэ көмөлөһүөхтээхтэр. Ол кинилэр ийэлэрин, аҕаларын иннилэригэр эбээһинэстэрэ. Оттон волонтердар аймаҕа-уруута суох, бэйэтин көрүнэр кыаҕа суох кырдьаҕаска көмөлөһөллөр, өйөбүл буолаллар. Сороҕор киһини соһутар дьон бааллар. Бэйэлэрэ маҕаһыыҥҥа сылдьар кыахтаах эрээри, бырааһынньыктыыр остуолларыгар үлэспит астарын-үөллэрин волонтердар тиэрдэн биэриэхтээхтэрин туруорсан сайаапкаланаллар. Сорохтор волонтердар харчы ылалларын курдук саныыллар. Онон өссө төгүл хатылаан эттэхпинэ, бары волонтердар сүрэхтэрин баҕатынан кыһалҕалаах дьоҥҥо биир кэппиэйкэтэ суох буор-босхо көмөлөһөллөр. Биһиги аҕыйахпыт, онон чахчы көмөҕө наадыйар дьоҥҥо көмөлөһүөхпүтүн баҕарабыт», — диэн эбэн этэр Александра Сидорова.

Санатар буоллахха, Ленскэй оройуонун волонтердарын куорпуһа пандемия кэмигэр сүүһүнэн сайаапканы толорбута уонна билигин да эппиэтинэстээхтик үлэлиир. Кинилэр кыһалҕалаахтарга астарын-үөллэрин, эмтэрин-томторун, туттар малларын-салларын дьиэлэригэр тиэрдэн биэрэллэр. Итинник кыһалҕалаах дьоҥҥо-сэргэҕэ көмөлөһөр сырдык-ыраас, үтүө, кэрэ санаалаах Ленскэй волонтердарын 2020 сыл бүтүүтүгэр «За бескорыстный вклад в организацию Общероссийской акции взаимопомощи «Мы вместе» диэн РФ Бэрэсидьиэнэ олохтообут мэтээлинэн наҕараадалаабыттара. Үтүө, сырдык санаалаах волонтердар көмөлөрө сыаналанан, мэтээли оройуон дьаһалтатын ыччат уонна дьиэ кэргэн бэлиитикэтигэр кэмитиэтин кэлэктиибэ, «ПроДобро» кэммиэрчэскэйэ суох организация, волонтер Магомед Исрапилов ылбыттара.

Волонтердар куорпустарыгар, үтүө дьыаланы оҥорорго хайаан да баҕа санааларынан көмөлөһөөччүлэр испииһэктэригэр суруппаккын диэн бэлиэтииллэр. Чугас дьоҥҥутугар, ыалгытыгар, билэр дьоҥҥутугар көмөлөһүҥ, оччоҕуна эһиги бэйэҕитин волонтербун диэн ааттыаххытын сөп.