Нэһилиэнньэ олоҕор-дьаһаҕар куттал суох буолуутун хааччыйар судаарыстыбаннай кэмитиэт иһитиннэрэринэн, ыам ыйын 1 күнүгэр, сарсыарда 10 чаастаах чахчынан, өрүс мууһун хамсааһына эриэ-дэхси.
edersaas.ru
Өлүөнэ өрүскэ көмүөл Ленскэй улууһунан устар. Муус алын кырыыта Хамра таһынан, үөһээ өттө Пеледуй таһынан көстөр. Ленскэй – Батамай хайысхатынан муус хамсаан эрэр. Уу таһыма Ленскэй куорат аннынан 382 см. буолла. Өлүөхүмэҕэ уонна киин улуустарга уу таһыма сууккаҕа 10-50 см үрдүүр, кытылынан уу тахсар.
Ньүүйэ өрүс Ленскэй улууһун Курум гидропоһунан муус устар 30 күнүгэр эһиннэ, ол эбэтэр урукку сыллардааҕар 12 хонугунан эрдэлээтэ. Көмүөл алын кырыыта Бэчинчэ бөһүөлэгинэн, үөһээ кырыыта Комака гидропост таһынан устар. Уу таһыма 442 см.
Өлүөхүмэ өрүс баһа муус устар 29 күнүгэр, аҕыс хонугунан эрдэлээн эһиннэ. Уу таһыма сууккаҕа 7-65 см эбиллэр. Тээнэ мууһа ыраастанна, уу таһыма түһэр. Төөмтөөн баһыгар (Алдан сүрүн салаата) муус хамсаан эрэр.
Амма өрүс уутун таһыма сууккаҕа 20-25 см эбиллэр. Бүлүү 15-20 хонугунан эрдэлээн эһиннэ, ити ууну мунньар сиргэ түһэр кытыы үрэхтэр эрдэ киирбиттэриттэн таҕыста. Сунтаар – Ньурба хайысхатынан уу таһыма сууккаҕа 30-40 см үрдүүр.
Раиса Сибирякова, «Саха сирэ» хаһыат, edersaas.ru