Коронавирус ыарыылаахтар бааллара биллибит Алдан уонна Ленскэй улуустарыгар бүгүҥҥү балаһыанньаны СӨ бырабыыталыстыбатын бэрэссэдээтэлин солбуйааччы Ольга Балабкина билиһиннэрдэ.
edersaas.ru
Алдан улууһугар харантыын биллэриллибитэ. Сонуну киэҥниҥ тарҕатар сириэстибэлэргэ иһитиннэриллибитин курдук, Алдаҥҥа коронавируһунан номнуо ыалдьыбыт киһи үлэтиттэн тохтообокко сылдьан, элбэх дьоҥҥо сыһыарбыта. Оттон иккис ыарыһах эппиэтинэстээх киһи буолан, хантаактаһар дьонун аҕыйаппыта. Ольга Валерьевна бу улууска вирус салгыы тарҕанарын бопсорго дьиэҕэ олоруу эрэ көмөлөһөрүн туһунан этэриттэн сылайбатын санатта.
Ленскэй улууһугар эмиэ уустук балаһыанньа үөскээтэ. Манна Арассыыйа атын субъегыттан баахтаҕа үлэлии кэлбит дьоҥҥо ыарыһахтар бааллара биллибитэ. Ольга Балабкина эппитинэн, өрөспүүбүлүкэ былааһа Чайаандаҕа вируһу утары охсуһарга штаб тэрийэргэ этии киллэрдэ. Ону сэргэ, коронавирус салгыы тарҕамматын туһугар Ямало-Ненецкэй автономнай уокуругу кытары хардарыта бииргэ үлэлии олохтонно.
Надежда ЕГОРОВА, “Саха сирэ”, edersaas.ru