Ленскэй саахалланар туруктаах дьиэлэртэн көһөрүүгэ федеральнай бүддьүөттэн 10 млрд тахса солкуобайы ылыаҕа
Ленскэй 2024 сылга диэри саахалланар туруктаах дьиэлэртэн көһөрүүгэ федеральнай бүддьүөттэн 10 млрд тахса солкуобайы ылыаҕа. Бу туһунан Саха сирин баһылыга Айсен Николаев Ленскэй оройуонугар сырыытын кэмигэр эттэ.
“Сууллар туруктаах дьиэлэртэн көһөрүү бырагырааматынан саамай улахан кээмэйдээх өйөбүллэртэн биирдэстэрин Ленскэй оройуон ылыаҕа. Манна 124 тыһ. кв м дьиэни көһөрүөхтээхтэр, маныаха улахан кээмэй Ленскэйгэ тиксэр. Ленскэйгэ федеральнай бүддьүөккэ көрүллүбүт суума 10 млрд тахса солкуобай. Куорат олорор дьиэтин фондатын үс гыммыт биирэ кэлэр биэс сыл иһигэр көһөрүллүөхтээх. Бу олус улахан үлэ, онон бу кээмэйинэн Ленскэй өрөспүүбүлүкэ үрдүнэн Алдан кэнниттэн иккис миэстэҕэ турар”, — диэтэ Айсен Николаев.
Айсен Николаев этэринэн, Ленскэйгэ үбүлээһин түһүмэхтэринэн бэриллиэҕэ. Саамай улахан кээмэйдээх үп 2022-2023 сылларга көрүллүөҕэ, итиннэ 60 тыһ. кв м олорор дьиэни көһөрүөхтэрэ.
Тустаах бырагыраама 2024 сылга диэри үлэлиэҕэ уонна Саха сирэ манна улахан өйөбүлү – 60 млрд солкуобайы ылыаҕа. Бу федеральнай бырагыраама бары үбүттэн 16 бырыһыана.
СИА.