Ленскэйгэ баһаарынай чааска сүрүн буҕаалтырынан үлэлээбит дьахтарга суут уурааҕа таҕыста.
Суут быһаарбытынан, бу дьахтар баһаарынай чаас отделениетын начальнигынан — сүрүн буҕаалтырынан үлэлиир кэмигэр, 2017 сыл ыам ыйыттан балаҕан ыйыгар диэри кэмҥэ, сокуону кэһэрин өйдүү-өйдүү, «1С Бухгалтерия» программанан бэйэтигэр 10 төгүл төлөбүр ыытан, уопсайа 1 мөл. 276 тыһ. солк. харчыны хорон сиэбит.
Сууттанааччы буруйун толору билиммит уонна ити уорбут харчытын «Маэстротрейд» диэн үп платформатыгар оонньууругар туттубутун итиэннэ сүүйтэрбитин туһунан көрдөрүү биэрбит.
Ленскэй суутун уурааҕынан, буруйдаах буҕаалтыр 120 тыһ. солк. сууммалаах ыстараап төлүүр. Маны таһынан, оҥорбут хоромньутун суут толору ирдэһэн ылбыт.
Бу туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн