Ленин проспегын саҥардан оҥоруу бастакы түһүмэҕэ түмүктэнэрэ чугаһаата
Ил Дархан Айсен Николаев Дьокуускай куоракка тутулла турар социальнай эбийиэктэри уонна «Куттала суох хаачыстыбалаах суоллар» национальнай бырайыак чэрчитинэн өрөмүөн үлэтэ ыытылла турар суоллары көрдө-иһиттэ.
Бастаан утаа Айсен Николаев Ленин проспегар ыытылла турар үлэни билистэ, былаан быһыытынан өрөмүөн бастакы түһүмэҕэ күһүн түмүктэнэр. «Киин куорат сүрүн суолун өрөмүөннээһин кыраапык быһыытынан баран иһэр. Билигин сотору бастакы түһүмэх, ол аата Кулаковскай уулуссаттан Дзержинскэйгэ диэри учаастак өрөмүөнэ түмүктэниэ, уһуна — 1,8 км. Аспааллааһын атырдьах ыйыттан саҕаланар, ону тэҥэ, уот, сибээс ситимнэрэ тардыллыахтара уонна тротуардары оҥоруу саҕаланыа. Онон былаан быһыытынан алтынньыга диэри Ленин проспега аһыллыаҕа», – диэн Айсен Николаев быһааран биэрдэ.
Бу кэнниттэн иккис түһүмэҕинэн Дзержинскэй уулуссаттан Хабаров уулуссаҕа диэри уонна Краснояров уулуссаттан Кулаковскайга диэри учаастактары (барыта 1,1 км) оҥоруу саҕаланыаҕа. Иккис түһүмэх 2023 сылга түмүктэниллиэҕэ. Санатар буоллахха, Ленин проспегын өрөмүөнэ былырыын алтынньыттан саҕаламмыта. Бырайыак быһыытынан түөрт балаһалаах буолуоҕа, барыта 2,9 км уһуннаах учаастак саҥардыллан оҥоһуллар.
Салгыы Ил Дархан Арктикатааҕы эпос уонна искусство киинин тутууну көрдө. Эбийиэк былаан быһыытынан 2024 сылга үлэҕэ киириэҕэ. Айсен Сергеевич Судаарыстыбаннай сакаасчыт сулууспатыгар бэдэрээтчиттэри кытары кыһын буолуон иннинэ эбийиэккэ быстах кэмҥэ туһаныллар ититиини киллэрэллэригэр сорудахтаата.
Билиҥҥи туругунан киин куоракка бассейннаах уонна катоктаах физкультурнай-чэбдигирдэр киини тутуу бара турар. Санатар буоллахха, «Газпром» ПАУо көмөтүнэн маннык хабааннаах икки комплекс өссө Чульмаҥҥа уонна Алдаҥҥа тутулла тураллар. Үһүс эбийиэк Дьокуускайга тутулла турар. Барыта этэҥҥэ бардаҕына, эбийиэк быйыл алтынньыга үлэҕэ киириэ. Билигин эбийиэк ис өттүн оҥоруу барар.
Андрей Сорокин хаартыскаларга түһэриилэрэ (СИА)