Бэс ыйын 16 күнүгэр СӨ Тырааныспарын уонна суол хаһаайыстыбатын миниистирэ Владимир Сивцев быһа эпииргэ тахсан, ыйытыыларга хоруйдаата.
Edersaas.ru
Дьокуускайга быйыл сайын 28 эбийиэккэ, ол эбэтэр, уулуса кэрчигэр өрөмүөн үлэтэ ыытыллыа. Онон ханнык эмит уулусса сабыллан, сылдьарга табыгаһа суох балаһыанньа үөскээтэҕинэ, өйдүүргүтүгэр ыҥырабын диэн миниистир эттэ.
— Ленин проспегар 2021-2022 сылларга хапытаалынай өрөмүөн ыытыллыаҕа. Ол эбэтэр, туох баар бүрүөһүннэрин, тротуардарын, инженернэй ситимнэрин, уу түһэр ханаабаларын барыта саҥаттан оҥоһуллуоҕа.
2021 сылга Хабаров уулуссатыттан Петровскайга диэри, 2022 сылга Петровскай уулуссатыттан Краснояров уулуссатыгар диэри оҥоһуллуоҕа.
Саха Өрөспүүбүлүкэтэ тэриллибитэ 100 сылыгар, 2022 сылга, киин куорат сүрүн уулуссатын хаачыстыбалаахтык, дьоһуннаахтык, бары өттүнэн толкуйдаан, өрөмүөннээн бүтэриэхпит диэн эрэнэбин, — диэн миниистир Владимир Сивцев кэпсээтэ.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.