Сүрүн

Ленин проспега саҥардыллар

Дьокуускай куорат киин уулуссата — Ленин проспегын хапытаалынай өрөмүөнэ бүтэрин бары анаан кэтиир, күүтэр буолбуппут мэлдьэх буолбатах. Ол да иһин буолуо, киин куорат мээрийэтин пресс-сулууспата таһаарар иһитинэриилэрин биири да көтүппэккэ ааҕабыт диэтэхпинэ, сыыспатым буолуо.

Быйыл Дьокуускай киин уулуссата — Ленин проспега бэйэтин аатын чиэстээхтик сүкпүтэ 60 сыллаах үбүлүөйэ. Ол эбэтэр 1962 сыллаахха Октябрьскай уулуссаны Ленин проспегар уларыппыттар. Дьокуускай кылаабынай уулуссата аан бастаан “Большой” диэн ааттааҕа. Өрөбүлүүсүйэ кэнниттэн, нууччалыыттан тылбаастаабакка холобурдаатахха, “Улица Великой Февральской революции” дэммит. 1924 сыллаахха — Улуу Өктөөп өрөбөлүүсүйэтин уулуссата, 1934 сыллаахха — Октябрьскай уулусса, 1962 сыллаахха — Ленин проспега. Ити курдук, олох тутула, сайдыыта уларыйан истэҕин аайы, киин куораппыт кылаабынай уулуссата аатын уларытан испит. Ол эрээри 60 сыл устата Ленин проспега буолан турара — устуоруйа биир өйдөбүнньүгэ буоллаҕа.

Бүгүн Дьокуускай куорат уокуруктааҕы дьаһалтатын пресс-сулууспатын кылаабынай исписэлииһэ Юлия Осипованы кытта Ленин проспегын хапытаалынай өрөмүөнүн хаамыытын, суолу тутуу туһунан кэпсэтэбит.

Үс сылга суоттаммыт үлэ

— Юлия, мээрийэ пресс-киинин үлэһиттэрэ суолу оҥоруунан дьарыктанар тустаах исписэлиистэри кытта бииргэ үлэлэһэр, күннэтэ көрсөн кэпсэтэр дьон буоллаххыт. Онон бүгүҥҥү кэпсэтиибит сүрүн тиэмэтэ — Ленин проспегын хапытаалынай өрөмүөнэ.

— Оннук. Дьокуускай куорат уокуруктааҕы пресс-сулууспатын саайтыгар “Суол өрөмүөнэ” диэн анал рубрикалаахпыт. Онно “БКД” (“Безопасные качественные дороги”) диэн хештегинэн киирэн куорат суолларын өрөмүөнүн туһунан бары интэриэһиргиир матырыйаалларгытын булан ааҕыаххытын сөп.

Дьокуускай куоракка Ленин проспегын хапытаалынай өрөмүөнэ 2023 сыл сэтинньитигэр диэри ыытылларын туһунан «Главстрой» МКУ дириэктэрэ Алексей Варламов быйыл бэс ыйын ортотугар суруналыыстары кытта көрсүһүүтүгэр бэлиэтээбитэ. Үлэ үс сылга диэри ыытылларга суоттаммыт. 2021 сыллаахха алтынньыга саҕаламмыт хапытаалынай өрөмүөнүн бастакы түһүмэҕэ быйыл алтынньыга бүтүөхтээх.

Бастатан туран, куорат кылаабынай проспегын ортотугар ыйанан турар кабеллары, сибээс лииньийэтин, ВОЛС ситимнэрин сир анныгар кистээһин барбыта. Маныаха сибээс оператордарын, сибээһи хааччыйар тэрилтэлэр салалталарын этиилэрэ барыта учуоттаммыта. Уруккуттан баар тохтобуллар миэстэлэрэ уларыйыа суоҕа. Үс ичигэс тохтобул баар буолуоҕа — «Центральнай», «Ленин болуоссата» уонна «Доҕордоһуу болуоссата».

Аспаалынан бүрүлүннэ

— Балаҕан ыйын 2 күнүнээҕи туругунан, Ленин проспегын суолун аспааллааһын үлэтэ 60%-на оҥоһулунна диэн иһитиннэриини таһаарбыккыт.

— Ленин проспегын өрөмүөнэ “Куттала суох хаачыстыбалаах суол” национальнай бырайыак чэрчитинэн ыытылларын бэлиэтиир тоҕоостоох. Проспегы аспааллааһын уонна тротуардары оҥоруу 60%-на бэлэм буолла. Бу туһунан сакаасчыт «Главстрой» МКУ иһитиннэрбитэ. «Дорстрой» ХЭУо бэдэрээттиир тэрилтэ балаҕан ыйын 20 күнүгэр диэри Кулаковскай уулуссатыттан Дзержинскэй уулуссатыгар диэри суолу аспаалынан бүрүйэр соруктаах үлэлиир. «Главстрой» МКУ суолу тутууга кылаабынай исписэлииһэ, Ленин проспегын хапытаалынай өрөмүөнүн техническэй надзорга эппиэттээх үлэһитэ Денис Стецюк бэлиэтээбитинэн, щебень-тааска уу халыйан сыппат буоллаҕына, аспаал-бетон булкааһынан суолу бүрүйүөххэ сөп.

Доруобуйаларынан хааччахтаах дьоҥҥо — ураты болҕомто

— Биир тирээн турар боппуруос — доруобуйаларынан хааччахтаах дьоҥҥо туһуламмыт ирдэбил суолу өрөмүөннээһиҥҥэ тутуһуллан эрэрэ, тустаах дьону үөрдэрэ чахчы.

— Бу боппуруос, кырдьык, өссө суолу өрөмүннээһиҥҥэ ылсыах инниттэн эрдэттэн быһаарсыллыбыта. Ол курдук, бэдэрээтчит техническэй сорудахха бырайыактыыр-сметалыыр документацияны оҥороругар Дьокуускай куораттааҕы инбэлииттэр уопсастыбаларын салалталарын кытта анаан сүбэлэспитэ, санааларын истибитэ. Онон “Главстрой” МКУ исписэлиистэрэ иһитиннэрбиттэринэн, Очиченко, Бестужев‑Марлинскай, 1‑кы колония, Тимирязев, Дежнев, Ильменскай, Чайковскай, Билибин, Труд, Маяковскай, Каландаришвили, Широких-Полянскай, Яков Потапов, Кеша Алексеев, “Гимеин” уулуссаларга нормативнай докумуоннарга олоҕуран, тустаах ирдэбиллэри тутуһан, доруобуйаларынан хааччахтаах дьоҥҥо суолга куттал суох буолуутугар үлэ барда. Маны таһынан, Мархаҕа Мархинскай уулуссаҕа пандустаах былаһааккалар баар буолуохтара.

Үөрэх дьылын баттаһа

— Саҥа үөрэх дьылын баттаһа ханна суолу аспааллааһын үлэтэ түмүктэннэ?

— Пригороднайга Цент-ральнай уулуссаны, Табаҕаҕа ул. Авиатордар уулуссаларыгар, Хатаска Каландаришвили, Октябрьскай, Ленин уулуссаларыгар, Тулагы Киллэмҥэ Уваровскай уулуссатыгар үлэ түмүктэммитин туһунан «Главстрой» МКУ мээрийэ пресс-сулууспатыгар биллэрбитэ. Речевой оскуолаҕа киирии суол (Покровскайдыыр шоссе 10 км) түмүктэнэрэ аҕыйах хонук хаалла. Эбийиэк 90% бэлэм. Бэдэрээттиир «РИК Автодор» АУо тутар-таҥар үлэни балаҕан ыйын 10 күнүгэр түмүктүөҕэ.

 

…Ити курдук, Дьокуускайга “Куттала суох хачыстыбалаах суоллар” национальнай бырайыак чэрчитинэн алтынньы бүтүөр диэри былааннаммыт 28 суол барыта аспаалынан бүрүллүөҕэ. Өрөмүөн үлэтэ кыраапыкка олоҕуран ыытыллар. Алтынньы бүтэһигэр диэри суол бэлиэлэрин туруоруохтара. Куорат мээрэ Евгений Григорьев биир интервьютугар бэлиэтээбитин курдук, “Куттала суох хачыстыбалаах суоллар” национальнай бырайыак чэрчитинэн ыытыллар үлэҕэ үс сыл устата суолу өрөмүөннүүр тэрилтэлэр биллэ уопутурдулар. Бэдэрээттиир тэрилтэлэр тиэхиньикэлэрин саҥардаллар, үлэлэригэр аныгы технология ньымаларын тутталлар.

 

ХААРТЫСКА:

Yakutskcity.ru саайтан.

 

Елена Потоцкая, «Саха сирэ» хаһыат

0
0
Telegram Whatsapp