Ленин проспега алтынньыга аһыллыаҕа

Бөлөххө киир:

Дьокуускай аҕа баһылыга Евгений Григорьев киин куорат 390 сылыгар аналлаах пресс-кэмпириэнсийэтигэр суруналыыстары кытары көрүстэ. Элбэх ыйытыыларга хоруйдаата.

Куорат олохтоохторун үксүлэрин уулуссалар өрөмүөннэрэ долгутар. Ленин проспегын аспааллааһын саҕаланан, алтынньыга диэри түмүктэниэхтээх уонна суол бэлиэлэрин туруоран, алтынньы бүтүүтэ тырааныспар сылдьарыгар аһыллыаҕа диэн мэр эттэ.

Үлэ саҕалыаҕыттан үгүс мэһэйдэри көрүстүбүт – былыргы көмүүлэр көстүөхтэриттэн саҕалаан, буор суураллыар диэри. Онон 3 миэтэрэ дириҥнээх сиринэн хаһан оҥордубут. Ол үрдүнэн, кыраапыктан хаалыы суох. Сарсын, балаҕан ыйын 11 күнүттэн Кулаковскай уулуссатыттан аспаал иккис араҥатын ууруу саҕаланыаҕа. Быйыл прокуратура дьиэтиттэн ЛОРП дьиэтигэр тиийэ проспект толору оҥоһуллан бүтүөҕэ. Дьэ, бүтэрэ бэрт кыра хаалла, — диэн Евгений Григорьев бэлиэтээтэ.

Дьэ, оччотугар, алтынньыттан саҕалаан толору өрөмүөннэммит, киэркэйбит, көбүс-көнө уулуссанан массыыналара сырылатан айаннаан барыахтара. Ленин проспега – киин куорат сирэйэ буоллаҕа, онон Дьокуускай 390 сылыгар бэртээхэй бэлэх буолуоҕа.

Ангелина Васильева, “Саха сирэ” хаһыат, edersaas.ru

Хаартыска: СИА.

+1
0
+1
0
+1
0
+1
0
+1
0
+1
0
+1
0