Бу күннэргэ СӨ успуордун министиэристибэтэ ”Сарсыардаҕын сэрээккэттэн саҕалаа” диэн быйыл сайын ыыппыт аахсыйата түмүктэнэн эрэр. Ол курдук, киин куорат кылаабынай болуоссатыгар сарсыардааҥы сэрээккэни “Стимул” кулууп (салайааччы Матвей Лыткин) инструктордара Владимир Иванов, Наталья Гоголева иилээн-саҕалаан үс ыйтан ордук ыыта сылдьаллар, дьарыктанааччылары хаалыктаах хаамыы тиэхиньикэтигэр үөрэтэллэр. Барыта 31 киһи сарсыардааҥы сэрээккэҕэ этин-сиинин эрчийдэ.
Географиялара киэҥ, Белгородтан, ыраах Дьааҥыттан, Тааттаттан, Уус Алдантан тиийэ кэлэн нэдиэлэҕэ алтата биирдии чаас устата дьарыктаммыттар. Сорохторо эбиитин Владимир Ильич нэдиэлэҕэ үстэ буолар пааркаҕа дьарыгар сылдьыбыттар. Үс ыйдаах сайыҥҥы үөрэх төһө туһалаах буолбутун сэрээккэлээбит дьонтон туоһуластыбыт.
Эльвира Максимова, библиотека үлэһитэ:
— Мин саас коронавирустаан баран Ленин болуоссатыгар тэриллибит дьарыкка бэс ыйын ортотуттан саҕалаан, икки ый кэриҥэ сылдьыахпыттан доруобуйабар туһалаах элбэх билиини ыллым. Олортон сүрүнэ – хаалыктаах хаамыыга үөрэнии. Бу дьарык көрүҥэ олус уустук тиэхиньикэлээх, киһи аҕыйах кэм иһигэр дөбөҥнүк үөрэммэт, ол эрээри, доруобуйаны тупсарыыга, чөл туруктаах сылдьарга туһата элбэх, ол да иһин аан дойду үрдүнэн хаалыктаах хаамыы күүскэ тарҕаммыта ыраатта.
Бу сарсыардааҥы дьарыктарга сылдьан тыҥам туругун чөлүгэр түһэрэргэ элбэхтик хамсанным, уопуттаах инструктордар көмөлөрүнэн, кинилэр такайыыларынан тыынар уорганнарга, сис тоноҕоһугар, илии-атах сүһүөхтэригэр аналлаах араас эрчиллиилэри оҥордум. Бу барыта доруобуйаҕа олус улахан туһалаах, киһи туругун тупсарар, чэбдигирдэр. Хаалыктаах хаамыы ымпыгын-чымпыгын баһылаабатарбын да, бу дьарык олус туһалааҕын эппинэн-хааммынан биллим. Түгэнинэн туһанан, киин куораппыт кылаабынай болуоссатыгар олус туһалаах дьарыгы тэрийээччигэ Лыткин Матвей Ивановичка уонна күннэтэ ис сүрэхтэриттэн, дууһаларын ууран туран биһигини үөрэппит, баай билиилэрин-көрүүлэрин үллэстибит, дьарыктаабыт инструктордарбытыгар Владимир Ильич Ивановка уонна Наталья Михайловна Гоголеваҕа улахан махталбын тиэрдиэхпин баҕарабын! Куорат олохтоохторун, ыалдьыттарын саастарыттан тутулуга суох бу бэртээхэй дьарыктарга сылдьыҥ, доруобуйаҕытын тупсарыҥ диэн ыҥырыам этэ!
Татьяна Романова, доруобуйа харыстабылын туйгуна, эмчит:
— Былчыҥ үлэтэ олоҕу уһатар, киһи уорганнара бары пааралыылар (иккилии харах, кулгаах, илии, атах, тыҥа уо.д.а.) диэн уруккуттан да билэр этим. Арай, сүрэх эрэ соҕотох курдук. Оннук буолбатах. Сүрэх пааратынан тымырдарбыт буолаллар. Тымырдар үчүгэйдик үлэлээтэхтэринэ сүрэх үлэлиир. Оттон тымырдар былчыҥ үчүгэйдик үлэлээтэҕинэ үлэлииллэр. Ол иһин биһиги эппитин-хааммытын уһугуннараары хас сарсыарда ахсын сэрээккэҕэ сылдьабыт, хаалыктаах хаамабыт.
Бу сайын үс ый устата инструктордарбыт салайыыларынан эрчиллэн, биһиги бары бөлөҕүнэн доруобуйабытын лаппа тупсардыбыт. Биир бэйэм сүрэҕим үлэтэ биллэ тубуста. Маннык сайын аайы сэрээккэлэри тэрийэн, элбэх киһи доруобуйатын бөҕөргөтүөххэ сөп эбит.
Кэргэннии Полина, Олег Домниннар (Дьааҥы улууһа):
— Быйыл сайын уоппускабыт кэмигэр Дьокуускайга кэлэ сырыттыбыт, бу күннэргэ дойдубутугар баран эрэбит. Киин куораппытыгар чөл олоххо дьон тардыһыыта күүһүрбүт, сарсыарда эрдэ сүүрбүт-эрчиллибит араас саастаах дьону көрөн сүргэбит көтөҕүлүннэ. Болуоссаттарга анал үөрэхтээх инструктордар сайыҥҥы кэмҥэ баҕалаах дьону эрчийэр буолбуттара олус үчүгэй эбит. Дьон кэпсиирин истэн, куорат килбэйэр киинигэр, Ленин болуоссатыгар түбэһэ түһэн, инструктор Владимир Ильич Иванов дьарыгар сылдьан үгүһү биллибит, доруобуйа кэһиллиитин чөлүгэр түһэрэр дьиҥ сөптөөх хамсаныыларга үөрэнэн, астынан, туһанан дойдубутугар дьоммутун сөптөөхтүк дьарыктыырга үөрэнэн баран эрэрбититтэн олус үөрэбит уонна кылгас кэмҥэ алтыспыт, олоххо тардыһыылаах үөрүнньэҥ саҥа доҕотторбутугар уонна доруобай дьон кэккэтин хаҥатыһар, бэйэтин дьыалатыгар бэриниилээх инструкторбытыгар махтанабыт, бары үтүөнү, кытаанах доруобуйаны баҕарабыт!
– Хаалыктаах хаамыы туһунан туох санаалааххытый? Дьааҥыга фитнес бу көрүҥэ төһө сайдан эрэрий?
– Сахабыт сиригэр скандинавскай хаамыы дириҥник силис-мутук тардынан, бары улуустарга бу доруобуйаны чөлүгэр түһэрэр успуорт көрүҥүнэн дьарыктанар дьон ахсаана эбиллэ турара киһини үөрдэр. Чуолаан Дьааҥы улууһугар мин бу көрүҥү урут бастаан саҕалааччылартан биирдэстэрэ буолабын. Улууспут бары кэриэтэ нэһилиэктэригэр хаамыыны сэргээччи, дьарыктанааччы үгүс.
Бу хаамыыны хоту дойдубут биир кэрэ сиригэр, Дьааҥы Арыылааҕар сынньалаҥҥа олорор успуорт бэтэрээнэ Сивцев Василий Иннокентьевич, уруккута нэһилиэк сэбиэтин салайааччыта хааман саҕалаабыта. Кини ыҥырыытын өйөөн, 2012 сылтан бу хаамыынан дьарыгы эдэркээн быраас Потапова Валерия Викторовна кэтээн көрүүтүнэн, уҥуох-сүһүөх, сүрэх-тымыр, хаан баттааһына кэһиллиилээх дьону түмэн, олохтоох култуура киинин иһинэн анал пааспардаах “Доруобуйа ыллыга” кулууп тэриллэн, билигин ол кулуупка 22 киһи утумнаахтык дьарыктанар, биирдиилээн да хааман саҕалааччылар үксээн иһэллэр. Бу хаамыы туһунан тэлэбиисэртэн, хаһыаттан, интэриниэттэн көрөн дьарыктанабыт.
edersaas.ru саайтка анаан Антонина СЕМЕНОВА.