Ленин болуоссатыгар педагогическай вакансия дьаарбаҥката буолла

Ааптар: 
Бөлөххө киир:

Бүгүн Дьокуускай куорат Ленин болуоссатыгар педагогическай вакансия дьаарбаҥката буолла. Тэрээһиҥҥэ киин улуустартан саҕалаан, хоту улуустар бэрэстэбиитэллэригэр тиийэ кытыннылар.

edersaas.ru

СӨ Үөрэҕин уонна наукатын министиэристибэтин каадыры кытта үлэҕэ уонна судаарыстыбаннай сулууспаҕа салаатын салайааччыта Анна Гуляева иһитиннэрэринэн, 2018 сыл тохсунньу 1 күнүнээҕи туругунан, үөрэх тэрилтэлэригэр 806 аһаҕас вакансия баар эбит. Итинтэн 223-һэ хотугу уонна арктическай улуустарга. Сүрүннээн англия тылын, алын кылаас, математика, нуучча тылын уонна литэрэтиирэтин, история уонна обществознание учууталлара ирдэнэллэр эбит. Оттон уһуйааннарга муусука салайааччылара, логопедтар, психологтар тиийбэттэр үһү. “Боппуруоһу быһаарар инниттэн, от, атырдьах ыйдарыгар “Учитель для Якутии” диэн ыстаап үлэлээтэ. Тэрээһин педагогтарга ханна аһаҕас вакансия баарын, үлэлиир, олорор усулуобуйаларын туһунан кэпсиир. Оттон үлэ биэрээччилэри үлэҕэ наадыйар дьон туһунан баазанан хааччыйар. Консультацияны социальнай ситимнэр, электроннай почта, саайт да нөҥүө ылаллар. Ону таһынан, бу ый 22-24 күннэригэр “Связист” спортивнай-чэбдигирдэр лааҕыр баазатыгар “Лидеры образования Арктики” диэн бырайыак сайыҥҥы оскуолата буолан ааста. Тэрээһин сүрүн сыалынан Муома, Эдьигээн, Өймөкөөн улуустарыгар үлэлиэн баҕалаах учууталлар хамаандаларын тэрийии буолар”, — диэн билиһиннэрдэ.

Дьаарбаҥка кэмигэр юридическай чааска ыйытыылаах дьоҥҥо сүбэ биэрдилэр. Тустаах министиэристибэ юриһа Гаврил Мыреев: “Дьаарбаҥкаҕа юридическай боппуруостарга сүбэ биэрэ олоробут. Сүрүннээн улуустааҕы үөрэх управлениетын үлэһиттэрэ кэлэн ыйыталаһаллар. Типовой уонна үлэҕэ дуогабардарын көрдөрөллөр. Оттон үлэ көрдөһөөччүлэр, холобура, үлэ дуогабарын, үлэһити тургутан көрөр болдьох, хамнас, үлэ күнүн бэрээдэгин туһунан ыйыталаһаллар”, — диэн кэпсиир.

Үлэ көрдөөччү син баар эбит эрээри, сэрэйбит курдук, үгүстэр киин улуустарга хаалар мөккүөрдээхтэр. “Иккиэн саха тылын уонна литэрэтиирэтин учуутала идэлээхпит. Кэргэним бакалавриаты 2016 сыллаахха бүтэрбитэ. Идэтинэн кыайан үлэ булбакка атын эйгэҕэ үлэлээбитэ. Мин магистратураны быйыл бүтэрдим. Идэбитинэн үлэлээри бы сайыҥҥыттан миэстэ көрдөһө сылдьабыт даҕаны, билиҥҥитэ була иликпит. Киин улууска көрдүүбүт эрээри, дьаарбаҥкаҕа хоту улуустарга эрэ миэстэлэр бааллар. Бу иннинэ, биэс сыл үлэлээбит дьоҥҥо “Жилье” бырагыраама үлэлиирэ. Хомойуох иһин, тустаах бырагыраама билиҥҥитэ тохтоон турар эбит. Дьиҥэр, ол бырагырааманан хоту да баран үлэлиир санаалаах этибит. Оччотугар ороскуоттаах буолсу дуу, дэһэ сылдьабыт”, — диэн Яна санаатын үллэстэр.

Оттон Үчүгэй орто оскуолатыгар (Өймөкөөн) кэлэр үөрэх дьылыгар физика, технология уонна эбии үөрэхтээһин педагогын вакансиялара бааллар эбит. Өймөкөөн улууһугар күн бүгүн 27 вакансия аһаҕас турар эбит. “Сайыны быһа вакансия ыстааба үлэлээтэ. Бу олус табыгастаах. Резюмены, дааннайдары чөкө биир сиргэ киирэн көрөбүт. Куһаҕана диэн, “Жилье” бырагыраама тохтоон турар. Ол биһиэхэ, ордук хотугу улуустарга олус туһалыыра. Оттон үлэлии тиийбит дьону дьиэнэн хааччыйыыга, хас биирдии бөһүөлэк тус-туспа көрүүлээх. Холобура, биһиги бөһүөлэк толору хааччыллыыта суох эрээри, киин ситимтэн ититиилээх хостору биэрэбит. Аныгы эдэр дьон ирдэбилэ олус үрдүк. Онон араас бырагыраамалар наадалар. Бүддьүөт миэстэтигэр үөрэммит саҥа бүтэрбит исписэлиистэри урукку курдук аныыллара буоллар диэн толкуйдаахпыт. Саатар, үс сыл тыа сиригэр баран уопутуран кэлиэх этилэр. Ыччат киин сиргэ талаһар. Ол гынан баран, куоракка даҕаны үлэ булар уустук ини, үрдүк категориялаах, уопуттаах дьону ыла сатыыллар”, — диэн Үчүгэй орто оскуолатын дириэктэрэ Валентина Карпова кэпсиир.

Министиэристибэ пресс-сулууспата иһитиннэрбитинэн, дьаарбаҥкаҕа улуустааҕы үөрэх управлениетын, орто анал үөрэх тэрилтэлэрин, оскуола, уһуйаан, уопсайа, 100-чэкэ бэрэстэбиитэлэ кыттыбыт.

2018-2019 үөрэх дьылыгар аһаҕас турар педагогическай вакансиялары СӨ Үөрэҕин уонна наукатын министиэристибэтин саайтыгар «Деятельность – педагогические кадры» диэн салааҕа    https://minobr.sakha.gov.ru/pedagogicheskie-kadry/10-vakantnye-mesta билсиэххитин сөп. СӨ Үөрэҕин уонна наукатын министиэристибэтин нүөмэрэ: (4112) 506-922.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0