Ленин болуоссатыгар – маастар-кылаастар

Ааптар: 
Бөлөххө киир:

Ленин болуоссатыгар “Молодые профессионалы” (WorldSkills-2018) Арассыыйатааҕы VI чөмпүйэнээт сүүмэрдиир күрэхтэһиитин арыллыыта буолла.

edersaas.ru

Тэрээһиҥҥэ СӨ бырабыыталыстыбатын бэрэссэдээтэлэ Евгений Чекин, бэрэссэдээтэли солбуйааччы Алексей Дьячковскай, Олег Базер (Москва), СӨ үөрэҕин уонна наукатын миниистирэ Владимир Егоров, ХИФУ проектора Михаил Федоров, о.д.а. кытыннылар.

Евгений Чекин тыл этэригэр: “Бүгүн аан дойду барыта саҥа технологическай цифровой платформаҕа көһөр, ити саамай үрдүк квалификациялаах исписэлиистэри бэлэмниири ирдиир. Билигин Арассыыйа туһанар WorldSkills ньымалара анал үөрэхтээһин систиэмэтэ төрдүттэн уларыйарыгар салайар”, — диэн бэлиэтээтэ.

Санатан эттэххэ, Саха сирэ WorldSkills хамсааһынтан туора турбат. Ол курдук, номнуо иккис сылын чөмпүйэнээт сүүмэрдиир күрэхтэһиитин тэрийэр. Былырыын өҥө оҥоруу хайысхаларыгар эбит буоллаҕына, быйыл IT идэлэригэр сыһыаннаах компетенцияларга ыыталлар. Уопсайа, 57 эрэгийиэнтэн 300-тэн тахса оҕо, устудьуон кыттар.

Саха сирэ иккис төгүлүн сүүмэрдиир күрэхтэһиини тэрийэр. Эрэгийиэннэр чаҕылхай кыттааччылара сүүмэрдэнэр буолан, биһиэхэ бу улахан суолталаах тэрээһин”, — диэн WorldSkills тэрээһиннэрин ыытыыга тэхэньиическэй дириэктэри солбуйааччы Олег Базер санаатын тиэртэ.

Кыттааччылар ааттарыттан андаҕар тылы чөмпүйэнээт “реверсивнэй инжиниринг” компетенциятын 2017 сыллааҕы кыайыылааҕа  Андрей Тихонов, оттон экспертэр ааттарыттан “промышленнай автоматика” компетенция эксперэ Вадим Попов эттилэр.

Тэрээһин арыллыытын чэрчитинэн бу күн Ленин болуоссатыгар үгүс оҕо, ыччат, төрөппүт тоҕуоруста. Манна “Идэлэр куораттара” диэн уонтан тахса орто анал үөрэх тэрилтэлэрин устудьуоннара, преподвателлэрэ кэлэн оскуола үөрэнээччилэригэр, устудьуоннарга, төрөппүттэргэ маастар-кылаастары көрдөрдүлэр. Ол курдук, холобура, Дьокуускайдааҕы медицинэ кэллиэһин устудьуоннара хаан баттааһынын (давление) хайдах сөпкө кэмнииртэн саҕалаан, оҕону хайдах суулуурга тиийэ быһаардылар. Оттон Намнааҕы техникум устудьуоннара тортары, пирожнайдары хайдах киэргэтэри көрдөрдүлэр. Бэл диэтэр, И.И.Фадеев аатынан үп-харчы экэнэмиическэй кэллиэһин устудьуоннара харчыта суох киһи бэйэ дьарыгын хайдах арыныан сөбүн туһунан кэпсээтилэр. Тыа хаһаайыстыбатын техникумун устудьуоннара үүт төһө арыылааҕын хайдах быһаарыахха сөбүн, дьиэ кыра кыылларыгар хайдах УЗИ оҥорору көрдөрдүлэр. Оннооҕор, сорохтор киэргэли чочуйан оҥорууга тиийэ үөрэттилэр. Онон бары өттүнэн туһалаах тэрээһин буолан ааста.

Дьокуускайдааҕы Гражданскай авиация  авиационнай техническэй училищетын 1 кууруһун устудьуона Вадим Себастьянов  хайдах сөпкө укуоллуурга маастар-кылаас биэрэ туралларын көрөн остуолга чугаһаата: “Бэрт тэрээһин. Төһө кыалларынан элбэхтик тэрийэллэрэ буоллар. Дьон үөрүүтэ үгүс, кэнсиэр эмиэ наһаа үчүгэй. Хаһан даҕаны укуол туруоран көрбөтөх буолан, түгэн тосхойбутугар холонон көрдүм. Киһи өйдүүр гына судургутук быһааран биэрэллэр”, — диэн санаатын үллэһиннэ.

Людмила ПОПОВА, “Саха сирэ” хаһыат, edersaas.ru

Ааптар хаартыскаҕа түһэриилэрэ.

 

+1
0
+1
0
+1
0
+1
0
+1
0
+1
0
+1
0