“Бэчээт тиэргэнэ-2017” тэрээһин чэрчитинэн, Н.Е.Мординов-Амма Аччыгыйа аатынан “Кэскил” ИДь биллиилээх суруйааччылар хоһооннорун доргуччу ааҕыыга үөрэнээччилэр ортолоругар күрэc тэрийдэ.
Куонкуруска уопсайа 37 оҕо кытынна. Оҕолор бары даҕаны бэрт дьоҕурдаахтар, талааннаахтар, өрөйөн-чөрөйөн, туттан-хаптан ааҕаллара болҕомтону тардар. Сорохтор олус уһун хоһооннору барытын өйгө туталларын киһи эрэ сөҕө көрөр, истэр.
Күөн күрэһи тэрийэн ыыппыт “Чуораанчык” сурунаал кылаабынай эрэдээктэрэ Татьяна Жиркова:
— Бу «Звени, колокольчик» (“Чуораанчык, чугдаар”) диэн куонкурус буолар. Оҕо үксэ даҕаны хоһоон ааҕарын сөбүлүүр. Быйыл барыта 37 оҕо кытынна. Балаһыанньа быһыытынан, биэс саастарыттан 5-с кылааска диэри үөрэнэр оҕолор хабыллаллар. “Чуораанчык” уонна “Колокольчик” оҕолорго аналлаах сурунааллар быйыл күн сирин көрбүттэрэ 30 саастарын бэлиэтииллэр. Ил Дархан Егор Борисов махталын ыллыбыт. Онон, эрэдээктэр буоларым быһыытынан, айар кэлэктииппэр айымньылаах, ситиһиилээх үлэни уонна элбэх ааҕааччылаах буолуон баҕарабын”.
Бастакы миэстэни биирдэ даҕаны иҥнэн көрбөккө, куолаһын араастык уларытан, Муса Джалиль айымньытыттан быһа тардан аахпыт Кристина Тимофеева ылла. Иккис миэстэҕэ Тамира Оконешникова таҕыста. Үһүс бириистээх миэстэҕэ Надя Оконешникова тигистэ.
Иккис, үһүс миэстэлэри үллэстибит эдьиийдии-балыс, Саха политехническэй лиссиэй 4-с кылааһын үөрэнээччитэ Тамира уонна быйыл билии киэҥ аартыгар үктэниэхтээх Надя ийэлэрэ Анегина Оконешникова: “Оҕолорбун араас таһымнаах куонкурустарга, түгэн көһүннэр эрэ, кытыннара сатыыбын. Сахалыы, нууччалыы эрэ хоһооннору үөрэтиинэн муҥурдаммакка, сорох хоһооннору бэйэбит көрдөһөн дьонунан тылбаастатабыт. Бу сырыыга Надя сахалыы, нууччалыы уонна англия тылыгар преподаватель Т.М.Ким, эбээн тылыгар филолог А.П.Степанов тылбаастаабыт Агния Барто “Олень” диэн хоһоонун аахта. Тамира үбүлүөйдээх бэйиэт Бүөтүр Тобуруокап “Уоһа хараарбыт” хоһоонунан кытынна. Маннык куонкурустар ыытыллаллара үчүгэй. Ханнык баҕарар күрэхтэһии оҕону сайыннарар, уопут биэрэр”, — диэн санаатын үллэһиннэ.
Биир чаас устата барбыт күрэс көрүөх бэтэрээ өттүгэр түмүктэннэ. Кыайыылаахтарга сыаналаах кинигэ бэлэхтэри, оттон кыттааччыларга бука барыларыгар туоһу сэртипикээттэри туттардылар.
Людмила ПОПОВА, “Саха сирэ” хаһыат, edersaas.ru
Ааптар хаартыскаҕа түһэриилэрэ.