Ааспыт сылга Саха сиригэр нэһилиэнньэ үлэлээх буолуутун хааччыйыы миэрэтинэн 4414 үлэ миэстэтэ тэриллэрэ ситиһиллибит. Маны салаалаларынан аттарар буоллахха, тутууга 2681, бырамыысыланнаска –1292, тырааныспарга уонна суол хаһаайыстыбатыгар –148, экологияҕа, ойуур хаһаайыстыбатыгар – 85, хомунаалынай хаһаайыстыбаҕа – 20, Арктика эргимтэтигэр – 98 миэстэни таһаарбыттар.
«Саха сирин салалтатын биир сүрүн бэлиитикэтинэн үлэ саҥа миэстэтин күүскэ тэрийии буолар. Бу өрөспүүбүлүкэбит нэһилиэнньэтин бигэ олоҕун хааччыйыы. Бу хайысхаҕа сүрүн болҕомто бырамыысыланнаска уонна ИТ технологияларга ууруллар», — диэн Ил Дархан Айсен Николаев быһаарар.
Бүгүҥҥү күҥҥэ Саха сиригэр сүрүн инвестиционнай бырайыактарынан Элгэтээҕи таас чохтоох сиргэ үс хайа-байытар фабриканы үлэҕэ киллэрии, хоту Күчүс диэн көмүс баайдах сири туһаҕа таһаарыыга бэлэмнэнии үлэтин саҕалааһын (дьоҕус атомнай ыстаансыйаны тутуу саҕаланар), Нерюнгри аттыгар Сиваглинскайдааҕы тимир рудатын карьерын уонна Сыыллаахтааҕы таас чох разреһын үлэлэтии буолаллар. Ити этиллибит түөрт сүүнэ бырайыак барыта 20 тыһ. кэриҥэ үлэ миэстэтинэн хааччыйыаҕа.
Ону тэҥэ, «ИТ-паарка» уонна «Саха сирэ» технопаарка ааспыт сылга 367 саҥа үлэ миэстэтин таһаарбыттар. Былаан быһыытынан 2024 сылга диэри ИТ-салааҕа барыта 10 тыһ. кэриҥэ киһи үлэнэн хааччыллыаҕа. Бырамыысыланнаска «Олохтоох каадыры — бырамыысыланнаска» диэн бырайыагы олоххо киллэриигэ тутуунан, сир баайын хостооһунунан дьарыктанар уонна тырааныспар хампаанньаларын кытта бииргэ үлэлииргэ 43 сөбүлэһии түһэрсиллибит. Ол түмүэр, 2021 сылга тустаах бырагырааманан 11 тыһ. киһи үлэлээх буолбут. Аҥардас көмүһү хостооһуҥҥа 1811 киһи үлэлээбит.
Александр Тарасов, «Саха сирэ» хаһыат, edersaas.ru